«AMANAT» партиясының жанынан құрылған «Құқықтық көмек» жобасы қазақстандықтарға тегін заңгерлік көмек тұрақты түрде көрсетіп келеді. Көпбалалы отбасыларға, аз қамтылған адамдарға, сондай-ақ алимент өндіріп алу, зейнетақы мен жәрдемақы тағайындау мәселелері және өзге де сұрақтар бойынша аталмыш жоба аясында құқықтық кеңес алуға болады.
Азаматтарға білікті мамандар заң аясында көмек көрсетеді. Кезекті «Құқықтық көмекті» «AMANAT» партиясы Шымкент қалалық филиал Атқарушы хатшысының орынбасары Тулегенов Бекайдар және қалалық мәслихат депутаты Қалмұратов Мұратәлі өткізді.
Қоғамдық қабылдауға келгендердің басым бөлігі несие берешегі бойынша жеке счеттары бұғатталғанына байланысты құқықтық кеңес сұрағандар болды.
Сонымен қатар, алимент өндіру, сот шешіміне наразылар және меншік құжаттарының дұрыс рәсімделмеуіне байланысты шағымданғандар да көп. Мәселен, Наурызбаева Гүлмира несие мәселесіне қатысты заңгерден көмек сұрады. Сапарбекова Әлия бірінші топ мүгедегі ретінде үй кезегі жылжымайтынын айтып шағымданды. Казимова Мирбахор есімді қала тұрғыны көршісінің іс-әрекетіне наразылығын білдіріп заң тұрғысынан қалай, кімге шағымдана алатынын сұрады. Қабылбекова Ұлбосын зейнетақысы дұрыс есептелмегенін және оны қалай шешуге болатынын сұрай келді. Арыз иелерінің дені заң тұрғысынан сауатсыздығына байланысты түрлі кедергілерге душар болғандар.
Келушілерге Тұран ауданы прокуратурасының бөлім аға прокуроры прокурорының көмекшісі Алтаева Сәуле, Zangerler Palatasi заң консультанты Мырзағалиева Анара және адвокат Тлеуов Ерлан кеңес берді.
