Тазалық – саулық негізі, саулық байлық негізі демекші, тазалық туралы сөз қозғар болсақ қоғам тазалығы, тіл, ар-ождан тазалығы, жеке бастың және қоршаған ортаның тазалығы осылай тізбектеле береді. Бұлардың әрқайсысы өзінше әңгіме етерлік тақырыптар. Алайда өмір сүрер ортамыздың тазалығын сақтау айтарлықтай маңызды екендігі рас.
Аудан келбеті тек сәнді ғимараттармен, тротуарлармен, жасыл желегімен өлшенбейді. Күн сайын көркейіп келе жатқан ауданның ажары оның тазалығына да байланысты. Ал тазалық пен ұқыптылық әрбір адамның туған жеріне деген сүйіспеншілігі мен жанашырлығын қажет етеді. Әрбір тұрғын өз ауласын таза ұстап, ақтап, сырлап отырса ауданға келген қонақтардың да құрметі артқан болар еді.
Біздің ауданымызда үлгілі аулалар жетерлік. Өз аулаларын көгалдандырып, ағаш көшеттерін отырғызып, айналасын мұнтаздай таза ұстайтын тұрғындар баршылық.Мұның бәрі ауданның келбеті, тұрғындардың игілігі үшін. Соны кез-келген ауыл тұрғыны түсініп, тазалықты өз ауласынан бастап, қоқыс шашпай, оны өртеп жіберіп отырса, біріншіден, көршілеріне деген құрмет, екіншіден туған жерге деген сүйіспеншілік дер едік. Әр азаматқа өзінің туған жері,туған елі қандай қымбат болса, сол жердің тазалығы да маңызды. Бүгін дәл осындай мақсатта Темірлан елді мекенінің кіре беріс жол бойында ұйымдастырылған аудандық сенбілікке Аудандық мәдениет үйінің қызметкерлері белсенді түрде қатысты.
