«Оңтүстік» индустриялық аймағында Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті, кәсіпкерлер палатасы мен «Shymkent» әлеуметтік-кәсіпкерлік корпорациясы» АҚ өкілдері кәсіпкерлермен кездесті.
Кездесуде Департаменттің Превенция басқармасы басшысының орынбасары Ғалымжан Өсербай бизнес мүдделерін қорғау бағытындағы Сыбайлас жемқорлыққа қарсы қызметтің жаңа тәсілдерінен, соның ішінде бизнестің дамуына кедергі келтіретін сыбайлас жемқорлық тәуекелдерін жою бойынша алдын алу жұмыстарынан хабардар етті.
Жиынға қатысушылардың сұрақтарына жан-жақты түсіндірме беріліп, кейбірі Департамент тарапынан зерделенетіні хабарланды. Мәселен, бизнес өкілі мемлекеттік кірістер органы тарапынан қарызының болуына байланысты банктік шоттарына мәжбүрлеу шаралары қолданылғанын жеткізді. Бизнес өкілі қарызын өтегенімен, шотынан бұғыттау алынбағандығына шағымданды. Іс-шараны ұйымдастырушылар көтерілген мәселелерді жан-жақты қарап, жауап беретіндіктерін жеткізді.
Жиында Департамент өкілі сыбайлас жемқорлыққа қарсы заңнамаға енгізілген соңғы өзгерістерді түсіндіріп, жемқорлық фактілері немесе кәсіпкерлік қызметке кедергі келтіру жағдайлары туралы Агенттіктің 1424 Call-орталығына хабарласуға шақырды.
Айта кету керек, осы тұрғыдағы кәсіпкерлермен кездесу «Оңтүстік» арнайы экономикалық аймағында да өтті.
