Мақтаарал ауданы Атакент кентінде орналасқан «Атакент» аудандық ауруханасы емделіп жатқан балаларға көтеріңкі көңіл-күй сыйлады.
1-маусым — Халықаралық балаларды қорғау күніне арналған мерекелік шарада балаларға түрлі сыйлықтар үлестіріліп, тегін балмұздақтар мен пицалар таратылды. Іс-шараға кенттің аумағында орналасқан «Сәкен бар» және «Бек» кафелері демеушілік көрсетті.
«Мемлекет басшысы Қасым-Жомарт Кемелұлы Тоқаев 2022 жылды «Балалар жылы» деп жариялауының астарында көп себеп жатыр. Өйткені, балалар — біздің болашағымыз, еліміздің болашағы. Еліміздегі бүкіл жүйелі жұмыстар, реформалар, өзгерістер — барлығы да балаларымыздың жарқын болашағы үшін жасалып жатыр. Сондықтан, бүгінгі мерекенің мән-мағынасы зор» — деді аурухананың бас дәрігері Ұлжанат Серікбаева.
Айта кетейік, балаларды қорғаудың халықаралық күні 1949 жылдан бері атап өтіледі. Жаздың бірінші күніне дәл келетін бұл күн — ең ерекше мерекелердің бірі.
