ҚР Парламенті Мәжілісінің депутаты Фахриддин Қаратаев пен AMANAT партиясы Әл-Фараби аудандық филиалының атқарушы хатшысы Арай Есенбек, партия жанынан құрылған аймақтық штаб мүшесі Бақтыбай Алипов «Су ресурстары маркетингі» ЖШС ұжымымен кездесіп, 5-маусымда өтетін референдумға қатысуға шақырды.
«Президент Қасым-Жомарт Тоқаев Конституцияға түзетулер енгізу бойынша республикалық референдум өткізуді ұсынды. Референдум — қоғам арасында қызу талқыланып, қолдау тауып отыр. Конституцияны бүкілхалықтық дауыс беру арқылы өзгерту — халықтың еркін білдіруінің айқын көрінісі», — деді мәжілісмен.
Соңғы Жолдауда Президент тың саяси реформаларды жариялап, билік институттары арасындағы конституциялық құрылымды жетілдіруге мүдделі екенін танытты. Өзгеріс аз емес, соның бірі — Парламент палаталарының рөлі күшейіп, мәртебесі артады. Мәжілісті қалыптастырудың аралас моделі енеді, Парламенттің бақылау функциялары кеңейеді, заңнамалық рәсімдер оңтайланады. Яғни, азаматтардың мүддесін қорғау механизмі күшейеді.
Реформалар сәтті өтсе, халық ел басқаруға қатысады. Бір мандатты округтер бойынша Мәжіліс депутаттары сайланады, мәслихат депутаттарының келісімімен баламалы негізде облыс әкімдері тағайындалады.
