Әл-Фараби ауданында биыл 50 аулаға балалар ойын алаңшасы салынады. Бұл туралы @akimat_shymkent инстаграм парақшасындағы тікелей эфирде аудан әкімі Рашид Мыңбаев мәлімдеді.
Ауданда орналасқан 672 көпқабатты тұрғын үй 400 аулаға біріктірілген. 2014-2020 жылдары 291 үйдің ауласы абаттандырылып, ойын алаңшасы орнатылған. 2021 жылы 27 үйдің ауласы жөндеуден өтіп, балалар алаңы қойлған. Оның ішінде 14 аула «Халық қатысатын» бюджет жобасы аясында жүзеге асырылған.
Абаттандыруды қажет ететін 82 ауланы қайта жөндеу жұмысы 2022-2023 жылдарға жоспарланып отыр. Биылдың өзінде «Халық қатысатын бюджет» жобасы аясында 50 аулаға балалар ойын алаңшасы орнатылады.
Сонымен қатар, Әл-Фараби ауданында 2021 жылы 31 ашық спорт алаңшасы пайдалануға берілген. Оның 6-ы демеушілер есебінен салынған. Ал, биыл 9 ашық спорт алаңшасын орнату үшін бюджеттен қаржы қаралса, 9 спорт алаңы ағымдағы жөндеуден өтеді.
Эфир барысында аудан әкіміне жүзден аса сұрақ жолданды. Тұрғындардың сауалы балалар ойын алаңшасы, көпқабатты үйлерде мүлік иелерінің серіктестігі мен жай серіктестік және мектеп құрылысы төңірегінде болды.
Р.Мыңбаев әр тұрғынның сұрағына егжей-тегжейлі жауап беріп, аудан аумағын көркейту бағытындағы ұсыныстарын «Халық қатысатын бюджет» жобасына ұсынуды айтты.
Шымкент қаласы әкімдігінің баспасөз қызметі
