Шымкент қаласында қазақ ұлтымен бірге көптеген ұлт өкілдері тұрады. Қоғамдық келісім мен жалпыұлттық бірлікке қол жеткізу мақсатында мегаполис әкімдігі көптеген шараларды жоспарлы жүргізіп келеді.
Таяуда ғана Әлішер Навои атындағы №11 мектепте «Тіл — татулық тірегі» тақырыбында қалалық форум өтті. Форумның мақсаты – мемлекеттік тілді кеңінен қолдануды насихаттау, тіл — татулықтың, достықтың тетігі, тәрбиенің көзі, халықты біріктірудің маңызды факторы екенін өскелең ұрпаққа ұғындыру.
Бір ай бойы орта білім беретін мектептердің ұстаздары тілді меңгерудегі жаңа әдістерге қанықты. Шеберлік сабақтарында тәжірибе жинақтаған олар білімдерін өскелең ұрпаққа жеткізетін болады.
Негматжан Алметов, М.Әуезов атындағы ОҚУ профессоры, педагогика ғылымдарының докторы: «Көп тіл білу-жаһандық талап. Сондықтан неғұрлым адам көп тілді білсе, сол тілдегі дүниелермен түп нұсқасында танысады. Ол керемет мүмкіндік береді. Мәселен әдебиет, ғылыми-техникалық туындылар және де өзге жобалардың 82 пайызы ағылшын тілінде үсынылған. Ана тілін білу шарт, алайда өзге де тілдерді меңгеру жарқын болашаққа жол ашады», дейді.
«Қазақстанның болашағы – Қазақ тілінде» деп бірінші президент айтқандай барлық этностар мемлекеттік тілді меңгеріп қазақ халқының айналасына топтасқан сайын жалпыұлттық бірлігіміз нығайып, қоғамымызда келісімді өмір болады.
