Шымкент қаласы Полиция департаменті ЖПҚБ Патрульдік полиция полкінің қызметкерлері әкімшілік аумақта қызмет атқару барысында терезесі күңгірттелген «Ваз» маркалы автокөлікті байқап, тоқтатқан. Яғни, терезесі күн сәулесі өту мөлшері ережесіне сай келмеген. Жалпы, көлік терезесін күңгірттеу құқық бұзушылықтың бір түрі болғандықтан оның жолын кесу үшін жұмыс жоспарлы ұйымдастырылып отырады.
Нәтижесінде автокөлік жүргізушісіне қатысты ҚР ӘҚБтК-нің 590-бабының 5-бөлігімен (Көлiк құралдарын пайдалану қағидаларын бұзу) хаттама толтырған. Осыдан соң полицей жүргізушіге терезесіндегі күңгірттелген пленканы алып тастауын қадағалап, қандай да бір орын алуы мүмкін жол апатының алдын алады.
Шымкент қаласының полицейлері тәулік бойы жол қауіпсіздігін қамтамасыз ету бойынша жұмыс жүргізіп келеді. Бір тәулікте атқарылған жұмыс барысында күңгірттеу (тонировка) бойынша – 66 дерек анықталған. Негізінде жүргізушілер арасында кең таралған жол қозғалысы ережесін бұзудың бір түрі – автокөліктің терезесін күңгірттеу. Терезені күңгірттеудің кесірінен құқық бұзушылықтар орын алып жатады.
Жалпы тәртіп сақшылары мұндай құқық бұзушылық жайттарын анықтау және жолын кесуге бағытталған жұмысты белсенді жалғастыруда. Өз кезегінде Шымкент қаласының полицейлері жүргізушілер және жол қозғалысына қатысушыларға ескертеді: осы тәрізді олқылықтарға жол бермеңіздер. Одан бөлек, жолда жылдамдықты асырмауға, маневр жасау қағидаларын бұзбауға, мүмкіндігінше сақтық шараларын қолданып көлік басқаруға кеңес береді.
