Қазақстанның болашағы жастар екенін, оларды заман талабына сай етіп тәрбиелеп, білімдарлықты бойына сіңіру арқылы еліміздің болашағын жарқын ете алатынымыз анық. Сондықтан да «Жастар саясаты» негізінде мемлекет тарапынан жас ұрпақтың тәрбиесі мен заманауи білім алуына мүмкіндігінше жағдай жасалуда. Оның ішінде Назарбаев зияткерлік мектептеріндегі білім беру сапасы әлемдік стандарттарға жауап бере алады. Осы мектептің оқушылары әлемдік, халықаралық білім олимпиадаларында көк байрағымызды желбіретіп, қазақстандық жастардың үздіктер қатарынан көрінуіне үлес қосып келеді.
Шымкент қаласындағы химия-биология бағытындағы Назарбаев зияткерлік мектебінің 10-сынып оқушысы Тазабек Еркебұлан география пәнінен өткен халықаралық олимпиадада (IGEO-2021) күміс медаль жеңіп алды. Оны тәрбиелеп дайындаған ұстазы Ақбөпе Жаманқұлқызы.
Олимпиада Түркияның Ыстанбұл қаласында 10-16 тамыз аралығында онлайн форматта өтті. Зияткерлік жарысқа әлемнің 46 елінен 200 оқушы қатысты.
Олимпиадаға Ақтөбе, Шымкент және Қызылорда қаласынан төрт оқушы, яғни республикалық пәндік олимпиаданың жеңімпаздары қатысты. Ұлттық құраманы жарысқа тәжірибелі педагогтер мен жаттықтырушылар дайындады. Зияткерлік сайыстың тапсырмаларын жоғары деңгейде орындаған қазақстандық төрт қатысушының үшеуі жүлдегер атанды.
IGEO олимпиадасы үш бөлімнен тұрады: жазбаша тест, мультимедиялық тест және далалық тур, оның форматы географиялық жағынан көптеген ұлттық олимпиадаларға ұқсас. IGEO негізінен қатысушылардың кеңістіктік қатынастары мен процестерді түсінуін, сондай-ақ осы білімді іс жүзінде экономикалық мақсаттарда қолдану қабілетін тексеретін олимпиада.
