Былтырғы жылдың көктемінде басталып, әлі де жалғасып келе жатқан коронавирус індеті халықтың күнделікті өміріне көп өзгерістер әкелді. Карантиндік шектеулер, кейбір азаматтардың соған орай жұмыссыз қалуы, бірқатар халыққа көрсетілетін қызметтердің онлайн форматқа көшуі сияқты жағдайлар жекелеген тұрғындарды тығырыққа тіреп, оңай жол іздеуге итермелеуде.
Жеңіл жол іздеп жарға жығылып жатқандар да бар. Пандемия кезінде аңқауларды алаяқтықпен алдап, қаржысын, мүлкін иеленіп кету оқиғалары көбірек орын ала бастады. Шымкент қаласының әкімі Мұрат Әйтенов таяуда мегаполистің бас полицейін қабылдап, жарты жылдық жұмысымен танысқанда, халықтың талап-тілегіне көбірек көңіл бөліп, құқықбұзушылықтың алдын алуды тапсырды.
Жалпы, Шымкент қалалық полиция Департаменті пандемия кезінде жұмысын қайта оңтайластырып, қала тұрғындарын түрлі қылмыстан, қауіптерден қорғауды тиімді ұйымдастыруға тырысуда.
Мысалы, 2021 жылдың 11-тамызында Шымкент қаласы Полиция департаменті Еңбекші аудандық полиция басқармасына қала тұрғыны арызданған. Ол өз арызында белгісіз тұлға жүргізуші куәлігін алып беретінін айтып, 140.000 теңге ақшасын заңсыз иемденіп кеткенін көрсеткен.
Шымкент қаласы ПД Еңбекші ауданының Полиция басқармасы криминалдық полиция бөлімінің қызметкерлері жедел-іздестіру іс-шараларын жүргізу барысында жергілікті азаматты анықтап, басқармаға жеткізді. Тексеру жұмыстары жүргізілуде.
Өз кезегінде тәртіп сақшылары бейтаныс азаматтарға ақша бермеуге шақырады.
Шымкенттік полицейлер алаяқтық жайтын ашты
