Президент Қасым-Жомарт Тоқаев өзінің «Жаңа жағдайдағы Қазақстан: іс-қимыл кезеңі» аталатын Жолдауының атауы айтып тұрғандай қазақстандықтарды пандемияға байланысты күрт өзгерген мына заманда көштен қалып қоймау үшін әділдікті, заңдылықты ту ететін мемлекет құруға атсалысуға шақырғаны белгілі. Құқық қорғау органдары құқық бұзушылыққа жол бермеудің жолдарын қарастырып, нақты да ұтымды шараларды ұйымдастыру арқылы қылмыстың алдын алып, азаматтарымыздың тыныштығын қорғауы тиістігі де айтылған.
Шымкент қаласында құқық бұзушылықтардың алдын алып, қылмыстың жолын кесу мақсатында түрлі жоспарлы жұмыстар үздіксіз жүргізіліп келеді. 2021 жылғы 20-шілдеден бастап 20 тамызға дейінгі аралықта Шымкент қалалық департаменті «Қару» жедел-профилактикалық іс-шарасын өткізуде. Жасалып жатқан рейдттер барысында қаруы бар азаматардың қаруының заңдылығын тексерумен бірге құқық бұзып тіркелмеген қару, оқ-дәрі ұстап жүрген, мүмкін болашақ бір қылмысқа ұрындырар жағдайлардың алдын алу мақсат етілген.
Шымкент ҚПД ЖПҚБ-на қарасты Патрульдік полиция полкінің қызметкерлерімен «Қару» жедел профилактикалық іс-шара барысында рейдтік жұмыстар ұйымдастырылды. Нәтижесінде, Шымкент қаласы аумағында «RAVON R3» маркалы автокөлігі тоқтатылып, тексеру барысында автокөліктен 1 қорап оқ-дәрі шығып сол секілді «Lada Granta» автокөлігі тоқтатылып, автокөлік ішінен қаруға ұқсас зат бар екендігі анықталған, аталған автокөлік иелері Қаратау аудандық Полиция басқармасына жеткізілді. Қазіргі таңда тергеу амалдары жүргізілуде.
Қала аумағында жүргізілген «Қару» жедел-профилактикалық іс-шарасының рейдтері барысында 264 тіркелген қару тексерілді. Тексеру барысында заңсыз қару сақтау, қару сақтау ережесін бұзу, қаруды тіркеу талаптарын орындамау сияқты құқық бұзушылықтар анықталды.
