Мемлекет басшысының халыққа арнаған Жолдауында Ұлттық халық санағына ерекше мән беруді міндеттеген. Қазақстандықтардың санын неғұрлым дұрыс анықтау демографиялық қана емес экономикалық, әлеуметтік, тағы басқа да салалар бойынша дұрыс жоспарлауға мүмкіндік береді. Сондықтан да бүгінде ұлттық санақ мәселесі бойынша үшінші мегаполисте де жоспарлы жұмыстар тыңғылықты жүргізілуде.
Шымкент қалалық жұмыспен қамту орталығының барлық аудан бөлімшелерінде ұлттық
халық санағына қатысуға арналған бұрыштар ұйымдастырылған. Яғни, тұрғындарға өзіне-өзі қызмет көрсету бұрыштарында онлайн түрде қатысуға мүмкіндік жасалынбақ. Санитарлық талапқа сәйкес, бөлімшелерге «Ashyq» қосымшасы арқылы кіруге міндеттелген. Қазіргі таңда маңызы зор іс-шараға дайындықтар жүргізілуде.
Еліміз тәуелсіздік алғалы бері үшінші рет өткізілгелі отырған халық санағы бұл жолы екі әдіспен жүргізіледі: онлайн-санақ және дәстүрлі тұрғындардың үйлерін аралау арқылы.
Онлайн түрде тұрғындар санақтан 1 қыркүйек – 15 қазан аралығында sanaq.gov.kz сайты арқылы өте алады.
Арнайы сайт арқылы санақтан өту үшін азаматтың ЭЦҚ (электрондв цифрлық қолтаңбасы) және ЖСН-ы (жеке сәйкестендіру нөмірі) болуы тиіс. Интернет арқылы тіркелген респонденттерді интервьюерлер екінші рет сауалнамадан өткізбейді.
Айта кетсек, ұлттық халық санағының 1-кезеңінде шаһарда санақ жүргізушілер тұрғын үйлер мен онда тұратын тұрғындардың санын нақтылау мақсатында әрбір елдімекенді аралап, аудандастыруға дайындықты қарқынды жүргізген болатын.
Нақты есеп нәтижесі ұлттық санақтың 2-кезеңінен соң мәлім болады. Ол 1 қыркүйектен 30 қазанға дейін созылады.
Ал, 1-30 қазан аралығында санақ кезінде персоналдары үй-үйді аралайтын болады. Тұрғындардың мәліметтері планшеттерге енгізіледі.
Ұлттық статистика бюросының Шымкент қаласы бойынша департаментінің мәліметінше, санақ жұмыстарына Шымкентте 1490 санақ персоналы, яғни 186 нұсқаушы-бақылаушы және 1304 интервьюерді жұмылдыру жоспарланған. Қауіпсіздік мақсатында санақ жүргізуге тартылған азаматтар тек вакцина ектіргендерден жасақталады.
