Мемлекет басшысы Қасым-Жомарт Тоқаев шағын және орта кәсіпкерлікті қолдау арқылы отандық өнім өндіру көлемін ұлғайтуды Жолдауында тапсырғаны белгілі. Шымкент қалалық әкімдігі арнайы экономикалық аймақтардағы жергілікті тауар өндірушілерді әрдайым қолдап, толыққанды жұмыс істеулеріне мүмкіндік жасап келеді.
«Билал» өндірістік кооперативі 1997 жылы құрылған. Мемлекеттің, оның ішінде жергілікті әкімдіктің қолдауы арқасында бүгінде серіктестерімен тығыз қарым-қатынас орнатқан компания. Алғашында гигиеналық құралдардың түрлерін шығара бастаған.
Ал қазір кәсіпорын жұмсақ лосьоны бар әмбебап ылғалды майлықтар шығарумен айналысады,-деп хабарлайды «Newqazaq.kz» ақпараттық порталы қала әкімінің баспасөз қызметіне сілтеме жасап.
Оны «Luna Fresh» сауда таңбасымен сатылымға шығарады. «Luna Fresh» ылғалды майлықтары теріні тазартады және сергітеді. Бұл қолдың, бет пен дененің терісіне күнделікті күтім жасау үшін өте қолайлы. Майлықтар антибактериалды лосьонмен сіңдірілген жұмсақ сырғымайтын материалдан жасалған. Компания бір реттік майлықтарды — 15, 25, 72 және 120 данадан тұратын пакеттерде дайындады. Дайын өнімдер дәріханаларда, емханаларда және қарапайым дүкендерде сатылады.
– Қазіргі уақытта компанияда 30-дан аса жұмысшы бар. Олардың әрқайсысы біздің компанияның дамуы үшін барын салады. Өнімдердің сапасын үнемі бақылап отырамыз және клиенттерімізге жоғары сапаға 100% кепілдік береміз, — дейді компания басшысы Гаджи Гаджиев.
Мекеме «БЖК-2025» мемлекеттік бағдарламасы арқылы төмен пайызбен айналым қаражатын толықтыруға және жабдықты сатып алуға несие алады. Бүгінгі күні компания дизайны басқа қосымша өнімдерді шығаруды жоспарлап отыр.
