Президент Қасым-Жомарт Тоқаев өзінің қазақстандықтарға Жолдауында дені сау, салиқалы да сындарлы жас ұрпақ тәрбиелеудің маңыздылығын айтқан еді. Ал ел болашағы бола алатын жастар тәрбиесінде жаман әдеттерге орын жоғы белгілі. Бүгінде жастар мен жасөспірімдерді жолдан тайдырып, тағдырын тәлкекке салатын жаман әдеттің ең үлкені – нашақорлық. Есірткіге үйір болған жастардың болашағы жоқ. Сондықтан да мегаполистің әкімдігі, құқық қорғаушылары бұл ғасыр індетімен үнемі бірлесе күресіп келеді.
Шымкент Қалалық Полиция департаменті Есірткі қылмысына қарсы іс-қимыл басқармасының қызметкерлері Жастар ресурстық орталығының өкілдерімен бірлесіп, қала аумағындағы сауда орындарында есірткі заттарын насихаттаудың және жарнамалаудың алдын алу бойынша профилактикалық жұмыс жүргізді.
Сатушыларға ашық түрде есірткі заттары бейнеленген киім-кешектерді, тұрмыстық бұйымдарды сатқаны үшін қолданыстағы заңнамаға сәйкес жауапкершілік қарастырылғаны туралы түсіндіріліп, ақпараттық парақшалар таратылды.
Кәсіпкерлік иелеріне адамның сезімі мен түйсіктеріне бейсаналық әсер ететін, есірткі заттарына қызығушылығын қалыптастыратын немесе оларды қолдайтын бейнелер мен жазулары бар заттарды сатуға тыйым салынып, заңмен жазаланатыны айтылды. ҚР ӘҚБтК-нің 423-бабына сәйкес, «есірткі, психотроптық заттарды және сол тектестерді, прекурсорларды насихаттау немесе заңсыз жарнамалау» – лицензиядан айыра отырып немесе онсыз, шағын кәсіпкерлік субъектілеріне – 300, орта кәсіпкерлік субъектілеріне – 500, ірі кәсіпкерлік субъектілеріне 1000 айлық есептік көрсеткіш мөлшерінде айыппұл салуға алып келеді.
Мемлекеттің Жастар саясатын нақты істермен қолдаған жастарды жаман әдеттен қорғайтын бұл бағыттағы түсіндірме жұмыстары мен құқық бұзушылықтың алдын алу алдағы уақытта да жалғасын табады.
