Мемлекет басшысы Қ.К.Тоқаевтың Жолдауындағы міндеттерді жүзеге асырып, құқық бұзу мен заң бұзушылықтардың алдын алу үшін Шымкент қаласында жан-жақты жұмыстар жоспарлы жүргізіліп келеді. Жаз мезгілі бастала салысымен қала аумағындағы шомылатын өзен, су жағалауларында демалатын халықтың қарасы көбейеді.
Төтенше жағдай қызметі мен полиция қызметкерлерінің судағы қауіпсіздік ережелерін сақтау туралы ескертулеріне қарамастан, суға кету және жарақаттану жағдайлары жиі кездеседі. Бұндай қайғылы жағдайлардың орын алуының басты себебі құқық пен заң талаптарын сақтамай, өрескел бұзу болып табылады. Сол суға шомылудың ережелерін сақтамау құқық бұзушылық екенін көптеген адамдар елей бермейді. Суға батып кетудің негізгі себептері –қарапайым қауіпсіздік ережелерінің сақталмауы, тыйым салынған орындарда шомылу, суға мас күйінде түсу, сондай-ақ, балаларды қараусыз қалдыру жағдайларының кесірінен орын алады.
Осыған орай, Шымкент ҚПД Әл-фараби АПБ қызметкерлері тұрғындарға «Судағы қауіпсіздік шаралары мен ережелері» туралы толығырақ түсіндірді. Субұрқақта шомылуға болмайтынын айтып, электр қатеріне ұшырау қауіпі бар екенін ескертті. Жас балалардың суда жүзе алмауы, адамдардың судағы қауіпсіздік ережелерін орындамауы – орны толмас қайғы мен өкінішке айналатын кездер көп. Сондықтан да шымқалалықтар мен қонақтардың қарапайым ережелерді сақтауы құқық бұзушылықтың алдын алуға, түрлі қайғылы жағдайдан аман қалуға көмектесетінін ұмытпағандары жөн.
Шымкент қаласы Полиция департаментінің қызметкерлері осындай келеңсіз оқиғаларды болдырмау үшін суда балаларды қараусыз қалдырмауға, тек рұқсат етілген жерлер мен жағажайларда шомылуға кеңес береді.
