Әл-Фараби атындағы қалалық ғылыми-әмбебап кітапханасында 10 қараша – Дүниежүзілік жастар күніне және 2026 жылдың Халықаралық еріктілер жылы болып жариялануына орай «Жастар – елдің интеллектуалдық капиталы» атты ауқымды кездесу кеші жоғары деңгейде ұйымдастырылды.
Кездесуді ҚР Журналистер Одағының мүшесі, «Уақыт» телеарнасының белгілі тілшісі А. Нұржанбай жүргізіп, жастардың осы заманғы қоғам дамуындағы айрықша рөлі, интеллектуалды әлеуеті мен еліміздің жарқын болашағын қалыптастырудағы маңызы жайлы салмақты ой қозғады.
Ауқымды кешті кітапхана директоры, филология ғылымдарының кандидаты, танымал айтыскер ақын, «Құрмет» орденінің иегері А. А. Жаппаркулова құттықтау сөзімен ашып, бүгінгі жас буынның сапалы білімге құштарлығын арттыру, кітап оқу мәдениетін кеңінен насихаттау және олардың бойында отансүйгіштік қасиеттерді қалыптастыру мәселелеріне кеңінен тоқталды.
Бұл тағылымды шараға Шымкент қаласы волонтерлар корпусының президенті, халықаралық ерікті Ж. Ашимова, Шымкент қаласы жастар саясаты басқармасы «Жастар ресурстық орталығының» бөлім басшысы С. Бүркітбай, «Шымкент-концерт» концерттік ұйымының дарынды эстрада әншісі, «Оқитын ұлт» жобасының Шымкент қаласы бойынша амбассадоры Бекзат Сәкенұлы, Шымкент қалалық тілдерді оқыту-әдістемелік орталығы директорының орынбасары Г. Калдыбаева, Ө. Жәнібеков атындағы ОҚПУ «Физика және математика» факультетінің 4-курс білім алушысы, белсенді студенттік ректор Н. Жұман, ҚР Журналистер Одағының мүшесі, «ADILET TV» телеарнасының білікті журналисі Қ. Байгөбек, белгілі заңгер әрі есепші Ә. Дуйсенова арнайы қатысты.
Кездесу барысында келген қонақтар жастардың қазіргі қоғамдағы белсенді азаматтық позициясы, заманауи көшбасшылық қасиеттерді дамыту, сапалы білім мен үздіксіз ізденістің рөлі, сондай-ақ көркем әдебиет оқудың тұлғалық қалыптасу мен ой-өрісті кеңейтуге тигізетін орасан зор ықпалы туралы өздерінің салиқалы ой-пікірлерімен, бағалы тәжірибелерімен бөлісті.
Бұл мазмұнды басқосу жас буынның өзара еркін пікір алмасуына, соны идеялар мен бастамаларды ортаға салуына және ел болашағы мен қоғам алдындағы өздерінің үлкен жауапкершілігін тереңірек сезінуіне бірегей мүмкіндік берді. Мұндай шаралар жастардың рухани-патриоттық тәрбиесін күшейтіп, олардың интеллектуалдық дамуына жол ашады.
Жастар – елдің болашағы мен интеллектуалдық капиталы!
