Түркістан облысы Кәсіпкерлер палатасының Өңірлік кеңес мүшесі, «Келешек-С» ЖШС директоры Салман Дүкенбаев кәсіпкерлердің бизнесін дамыту барысында кездесетін өзекті мәселелерді көтерді.
Кәсіпкердің айтуынша, бизнесті дамытуға, отандық өндірісті қолдауға және жаңа жұмыс орындарын ашуға бағытталған несие қаражатын алу кезінде бірқатар кедергілер туындайды. Атап айтқанда, несие рәсімдеу барысында жабдықтар бағасының өзгеруі кәсіпкерлерге қосымша қаржылық салмақ түсіреді. Сонымен қатар банктермен өзара қарым-қатынаста кәсіпкерлердің құқықтары мен мүдделерін қорғау мәселесі де маңызды.
Бұдан бөлек, газ, су және электр желілеріне қосылу кезінде құжаттарды рәсімдеу мерзімінің ұзақтығы мен қосылу құнының тұрақсыздығы кәсіпкерлік қызметке кері әсерін тигізіп отыр.
Осыған байланысты Салман Дүкенбаев кәсіпкерлердің құқықтары мен мүдделерін қорғау мақсатында «Атамекен» ҰКП мен екінші деңгейлі банктер арасында меморандум жасасуды, сондай-ақ коммуналдық желілерге қосылу тарифтерін белгілеу жөніндегі тұрақты комиссия құрамына Кәсіпкерлер палатасының өкілін енгізуді ұсынды.
Айта кетейік, Салман Дүкенбаев «Атамекен» Ұлттық кәсіпкерлер палатасының XIV съезіне Түркістан облысынан қатысатын делегаттар қатарында. Съезд аясында өңір кәсіпкерлерінің ұсыныстары мен өзекті мәселелерін көтеру – бизнес мүддесін қорғау бағытындағы маңызды қадамдардың бірі.
