Түркістан облысында алғаш рет ұйымдастырылған «Адал кәсіпкер – 2026» өңірлік байқауының жеңімпаздары анықталып, Кәсіпкерлер күніне арналған салтанатты іс-шарада марапатталды. Бес номинация бойынша үздік деп танылған кәсіпорындарға дипломдар мен арнайы естелік статуэткалар табысталды.
Байқау Қазақстан Республикасы Президенті Әкімшілігі бекіткен «Заң және тәртіп» идеологемасын ілгерілету жөніндегі 2026 жылға арналған іс-шаралар жоспарының 78-тармағы аясында ұйымдастырылды. Басты мақсаты – адал кәсіпкерлік мәдениетін қалыптастыру, бизнестің ашықтығы мен әлеуметтік жауапкершілігін арттыру, заң талаптарын сақтап жұмыс істейтін кәсіпорындарды ынталандыру.
Байқау жеңімпаздарын анықтау үшін бұған дейін Түркістан облысының кәсіпкерлер палатасында конкурстық комиссияның арнайы отырысы өтті. Отырысқа комиссия төрағасы, Палата директорының орынбасары Бахытжан Құралбаев жетекшілік етті.
Комиссия құрамына Түркістан облысы бойынша Мемлекеттік кірістер департаменті басшысының орынбасары Берік Қаипов, Мемлекеттік еңбек инспекциясы комитетінің облыс бойынша департаменті басшысының орынбасары Мұрат Төлендиев және облыстық Кәсіпкерлік және сауда басқармасының бас маманы Бауыржан Әділханов кірді.
Отырыста облыстың бес кәсіпорнынан түскен өтінімдер қаралды. Қатысушылар салық тәртібі, әлеуметтік жауапкершілік, еңбекті қорғау және қауіпсіздік, бизнестің ашықтығы мен іскерлік беделі бойынша 100 балдық жүйемен бағаланды. Салықтық міндеттемелердің орындалуына қатысты ақпаратты Мемлекеттік кірістер департаменті ұсынды.
Комиссия шешімімен бес номинация бойынша жеңімпаздар анықталды:
* «Үлгілі салық төлеуші» – «Майлыкент Сүт» АӨК (Түлкібас ауданы). 2007 жылдан бері сүт өңдеумен айналысатын кәсіпорын 80 адамды тұрақты жұмыспен қамтып отыр.
* «Әлеуметтік жауапты бизнес» – «Ақниет Holding» мүгедектер қоғамы ҚБ (Сауран ауданы). Мүмкіндігі шектеулі азаматтарды жұмыспен қамтып, отандық оқушы парталарын өндірумен айналысады.
* «Қауіпсіз өндіріс» – «Наурыз-5» ЖШС (Сайрам ауданы). 2001 жылдан бері көкөніс өңдеу саласында жұмыс істеп, өндірісте санитариялық нормалар мен қауіпсіздік талаптарын сақтайды.
* «Ашық бизнес» – «Bah_Asmar» ЖШС (Сарыағаш ауданы). BEREKE маркасымен отандық электр шәйнектерін шығарып, 100 жұмыс орнын ашқан.
* «Үздік шағын бизнес» – «Арай» өндірістік кооперативі (Арыс қаласы). 33 жылдан бері былғары аяқ киім өндірісімен айналысып, өнімдерін Қазақстан мен Ресей нарығына жеткізіп келеді.
Жеңімпаздар 29 қазанда Кәсіпкерлер күніне орай өткен салтанатты іс-шарада марапатталды.
Түркістан облысы Кәсіпкерлер палатасының директоры Асылан Ибадуллаев байқаудың кәсіпкерлік ортадағы жауапкершілік пен сенім мәдениетін қалыптастырудағы маңызын атап өтті.
«Бүгінде кәсіпкердің жетістігі тек өндіріс көлемімен немесе табысымен өлшенбейді. Оның заң талаптарын сақтауы, салықты уақытылы төлеуі, қызметкерлеріне лайықты еңбек жағдайын жасауы және қоғам алдындағы жауапкершілігі де маңызды. Біз осындай кәсіпкерлердің еңбегін бағалап, олардың тәжірибесін өзгелерге үлгі етуді мақсат еттік.
Мемлекет басшысы атап өткен «Заң және тәртіп» қағидаты кәсіпкерлік салада да нақты көрініс табуы керек. Заңға құрметпен қарайтын, ашық әрі жауапты жұмыс істейтін бизнес қана ұзақ мерзімді сенімге ие болады. Сондықтан адал кәсіпкерлерді қолдау – тек марапаттау емес, өңірдегі іскерлік ортаның сапасын арттыруға бағытталған жұмыс. Бұл байқауды алдағы уақытта да жалғастырып, үздік тәжірибелерді кеңінен насихаттауды жоспарлап отырмыз», – деді Палата директоры.
Айта кетейік, байқау жеңімпаздары туралы ақпарат арнайы «Адал кәсіпкерлер» тізіліміне енгізіледі. Түркістан облысының кәсіпкерлер палатасы бұл бастаманы дәстүрлі түрде өткізіп, заң талаптарын сақтап, өңірдің әлеуметтік-экономикалық дамуына үлес қосып жүрген кәсіпорындардың тәжірибесін кеңінен танытуды көздейді.
