Құрметті отандастар! Ардақты ағайын, Шымкент қаласының тұрғындары мен меймандары!
25 қазан – халқымыздың мемлекеттілік мұратын айқындап, тәуелсіздікке бастар даңғыл жолды ашқан тарихи маңызы зор ұлттық мереке. Бұл күн – елдігіміздің бастауы, егемендігіміздің саяси-құқықтық негізі және Қазақстанның жарқын, гүлденген болашағына деген сөнбес сенімнің ұлы символы.
1990 жылғы 25 қазанда Мемлекеттік егемендік туралы декларацияның қабылдануы еліміздің көпғасырлық тарихындағы ең басты бетбұрысты кезеңдердің бірі болды. Бұл тарихи шешім Қазақстанның дербес, егемен мемлекет ретінде қалыптасуына берік негіз қалап, толыққанды тәуелсіздікке қарай жасалған ең маңызды да батыл қадамға айналды. Бүгінде Республика күні – ұлттық рухты көтеріп, елдік құндылықтарды, отансүйгіштік пен әділдікті дәріптейтін, өткен тарихымыз пен бүгінгі жасампаздығымызды сабақтастыратын ерекше салтанатты мереке.
Қазақстанның басты әрі баға жетпес жетістіктерінің бірі – ел ішіндегі бейбітшілік, тұрақтылық пен қоғамдық келісімнің сақталуы. Түрлі этнос өкілдерінің бір шаңырақ астында тату-тәтті, бауырластықта өмір сүріп, ортақ мақсат – Отанның гүлденуі жолында адал еңбек етуі – мемлекетіміздің ең үлкен байлығы. Өзара құрмет, сенім, жанашырлық пен ынтымаққа негізделген қоғам ғана тұрақты дамуға қол жеткізіп, келешек ұрпаққа кемел әрі бейбіт болашақ қалыптастыра алады.
Шымкент қаласының ұйғыр этномәдени бірлестігі үшін де Қазақстандағы бірлік пен келісімді нығайту, ұлттық мәдени құндылықтар мен дәстүрлерді сақтау, ұрпақтар сабақтастығын ардақтау және азаматтық жауапкершілікті арттыру – басты әрі маңызды міндеттердің бірі. Шымкенттегі ұйғыр халқының өкілдері еліміздің қоғамдық, мәдени, білім беру мен әлеуметтік өміріне белсенді араласып, ортақ Отанымыздың өркендеуіне өздерінің сүбелі үлестерін қосып келеді. Бұл – Қазақстанның әрбір азаматы үшін ел тағдырының ортақ екенін және оның келешегі бәріміздің жасампаз еңбегімізге байланысты екенін көрсетеді.
Біз үшін Отанға деген сүйіспеншілік – туған жерді, оның табиғаты мен тарихын құрметтеу, елдің тыныштығын сақтау, қоғамдағы татулықты нығайту және мемлекетіміздің дамуына адал еңбекпен үлес қосу. Республика күні әрбір азаматқа осы асыл құндылықтарды терең сезініп, ел болашағына деген отансүйгіштік жауапкершілігін арттыруға мүмкіндік береді.
Осы айтулы мереке қарсаңында барша отандастарымды Республика күнімен шын жүректен құттықтаймын! Әр шаңыраққа амандық, молшылық пен береке тілеймін. Елімізде тыныштық пен тұрақтылық салтанат құрып, халқымыздың бірлігі нығая берсін. Мемлекеттік рәміздеріміз биікте желбіреп, Тәуелсіздігіміз тұғырлы, егемендігіміз мәңгі, Қазақстанымыздың абыройы асқақ болсын!
Республика күні құтты болсын!
Искендиров Динмухамед Жармуханбетович,
«Шымкент қаласының ұйғыр этномәдени бірлестігі» қоғамдық бірлестігінің төрағасы
