Шымкент қаласындағы Жеңіл өнеркәсіп және сервис колледжінде жастар арасында қоғамдық келісім мен жалпыұлттық бірлік құндылықтарын насихаттауға бағытталған ақпараттық-түсіндіру кездесуі өтті.
Кездесуге Шымкент қаласы Дін істері басқармасының «Дін мәселелерін зерттеу орталығы» КММ-нің теолог маманы Уәлихан Самат, Шымкент қаласы ішкі саясат басқармасының «Қоғамдық келісім» КММ қызметкері Нұржан Абдукаримов және «Жастар орталығы» КММ қызметкері Руслан Мизамбек қатысты.
Іс-шара барысында жастарға қоғамдық келісім мен тұрақтылықты сақтау, этносаралық татулықты нығайту, жалпыұлттық бірлік қағидаттарын дәріптеу және діни сауаттылықты арттыру мәселелері бойынша түсіндіру жұмыстары жүргізілді.
Сонымен қатар жастардың бойында өзара құрмет, толеранттылық пен жауапкершілік құндылықтарын қалыптастырудың маңыздылығы атап өтілді. Қатысушылар өздерін толғандырған сұрақтарын қойып, мамандармен пікір алмасты.
Кездесу барысында қоғамдағы бейбітшілік пен келісімнің сақталуы әрбір азаматтың ұстанымы мен іс-әрекетіне байланысты екені түсіндірілді. Әртүрлі этнос өкілдерінің мәдениеті мен дәстүріне құрметпен қарау, өзара түсіністік таныту және ортақ құндылықтарды бағалау – берік қоғам қалыптастырудың маңызды негіздері. Осы тұрғыда жастардың қоғамдық өмірге белсенді араласуы мен азаматтық жауапкершілігін арттыруға ерекше мән берілді.
Мамандар діни сауаттылықтың маңызына да тоқталып, жастарды діни мазмұндағы ақпараттарды дұрыс саралауға шақырды. Қазіргі ақпараттық кеңістікте түрлі мәліметтер мен көзқарастардың таралуына байланысты олардың шынайылығын тексеру, сенімді дереккөздерге жүгіну және күмәнді ақпаратқа сын көзбен қарау қажеттігі айтылды. Сонымен бірге деструктивті діни ағымдардың ықпалына түсудің алдын алу үшін білім мен саналы таңдаудың маңызы түсіндірілді.
Жастар арасында толеранттылықты қалыптастыру да кездесудің маңызды бағыттарының бірі болды. Өзгелердің пікірін тыңдау, келіспеушіліктерді сабырмен талқылау және мәселелерді бейбіт жолмен шешу дағдылары қоғамдық қарым-қатынасты жақсартуға ықпал етеді. Мұндай қасиеттер болашақ мамандардың кәсіби ортада да, күнделікті өмірде де жауапкершілікпен әрекет етуіне негіз болады.
Ақпараттық-түсіндіру кездесулері жас буынның қоғамдық келісім, ұлттық бірлік және діни сауаттылық туралы түсінігін кеңейтуге мүмкіндік береді. Осындай жұмыстар арқылы жастардың бойында отансүйгіштік, өзара сыйластық пен ортақ іске жауапкершілікпен қарау қасиеттерін қалыптастыру көзделеді. Қоғамдағы татулықты сақтау мен бірлікті нығайту – баршаға ортақ міндет.
