Шымкентте техникалық және кәсіптік, орта білімнен кейінгі білім беру қызметкерлері күніне орай «Кәсіби білім – кемел болашақ» атты салтанатты жиын өтті. Аталған ресми мереке техникалық және кәсіптік білім беру саласының беделін арттыруға бағытталған мемлекеттік саясат негізінде республикалық күнтізбеге енгізілген болатын. Жастар ресурстық орталығында өткен мерекелік іс-шарада саладағы жетекші мамандар бас қосты.
Салтанатты жиынға колледж директорлары мен педагогтері, өндірістік оқыту шеберлері, сала ардагерлері, студенттер және әлеуметтік серіктестер қатысты. Дәстүр бойынша мерекелік іс-шара көрмеден басталды. Онда қонақтарға оқу орындарының жетістіктері таныстырылды. Кәсіби даярлық бағытындағы озық тәжірибелермен қатар, білім алушылардың шығармашылық және инновациялық жобалары көпшілік назарына ұсынылды.
Колледждердің жетістіктері өз ісіне адал, кәсіби мамандардың еңбегінің арқасында қалыптасып ортар. Шымкент қаласы білім басқармасының басшысы Қуаныш Ысқақов атап өткендей, бүгінде әр маманның техникалық және кәсіптік білім беру жүйесін дамытуға қосқан үлесі артып келеді. Бұл жүйе экономиканы дамытуда маңызды рөл атқарады.
«Техникалық және кәсіптік білім беру жүйесі еліміздің экономикалық әлеуетін арттырудың және өндірістік саланы дамытудың негізгі тетіктерінің бірі саналады. Қазіргі таңда қаладағы 35 колледжде 48 мыңнан астам студент білім алуда. Өңірдегі кәсіпкерлік субъектілерімен әріптестікті жолға қоюдың нәтижесінде 22 колледжде 10 мыңға жуық студент дуальды оқыту жүйесі бойынша білім алып жатыр. Еңбек нарығында сұранысқа ие мамандарды даярлау мақсатында оқу бағдарламалары жұмыс берушілердің талаптарымен толық сәйкестендірілген. Сонымен қатар, WorldSkills халықаралық қозғалысы аясында біздің студенттеріміз де жоғары нәтижелер көрсетіп келеді. Жақында Шанхай қаласында өткен WorldSkills Shanghai – 2026 халықаралық чемпионатында студентіміз кәсіби шеберлігі үшін медаль иеленді», – деді басқарма басшысы.
Бұл жетістіктер Шымкент колледждерінде жастардың кәсіби құзыреттілігін арттыруға, практикалық даярлығын жетілдіруге және халықаралық деңгейде сұранысқа ие мамандар қалыптастыруға бағытталған жүйелі жұмыстың нақты нәтижесін көрсетеді.
Тағылымды жиын барысында салада ұзақ жылдар бойы абыройлы қызмет атқарып, жас мамандарды тәрбиелеуге өз үлесін қосқан ардагерлер мен озық педагогтерге, сондай-ақ өндірістік оқыту шеберлеріне арнайы құрмет көрсетілді. Сала үздіктері «Білім беру ісінің құрметті қызметкері» төсбелгілерімен және Құрмет грамоталарымен марапатталды. Аға буын өкілдерінің адал еңбегі мен кәсіби шеберлігі – жас ұрпақ үшін жауапкершілік пен отансүйгіштіктің, еңбекқорлықтың айқын үлгісі болып табылатыны ерекше атап өтілді.
Мерекелік кеш студенттер дайындаған концерттік бағдарламаға ұласып, әсем әндер мен патриоттық рухтағы шығармалар шырқалды. Мұндай іс-шаралар жастардың таңдаған кәсібіне деген сүйіспеншілігін арттырып қана қоймай, бойында азаматтық жауапкершілік пен ел болашағына деген сенімді қалыптастыруға зор ықпал етеді. Еңбекті құрметтеу мен кәсіби білімді дәріптеу – заманауи дамыған қоғамның рухани діңгегі болып қала бермек.
