Шымкент медициналық колледжінде жастар арасында этносаясаттың негізгі бағыттарын түсіндіру, қоғамдық келісім мен тұрақтылықты нығайту, сондай-ақ діни сипаттағы жат ағымдардың алдын алу мақсатында ақпараттық-түсіндіру кездесуі өтті.
Кездесу барысында жастарға этносаралық татулық пен қоғамдық келісімнің маңызы, Қазақстандағы этносаясаттың негізгі қағидаттары, діни сауаттылықты арттыру және радикалды діни идеологияның алдын алу мәселелері жөнінде ақпарат берілді. Мамандар қазіргі қоғамда жастардың түрлі ақпарат көздерінен келетін мәліметтерге сыни көзқараспен қарауы, ақпараттың шығу тегін тексеруі және діни мәселелер бойынша сенімді дереккөздерге жүгінуі маңызды екенін атап өтті.
Іс-шараға Шымкент қаласы ішкі саясат басқармасының «Қоғамдық келісім» КММ-нің маманы Бектұрсын Омарбаев, қалалық Дін істері басқармасы «Дін мәселелерін зерттеу орталығы» КММ-нің теолог маманы Самат Уәлихан, сондай-ақ, Жастар ресурстық орталығының Аутрич және NEET жастармен жұмыс бөлімінің маманы Нұржақсын Қармантай қатысты.
Кездесу барысында мамандар жастардың сұрақтарына жауап беріп, қоғамдағы тұрақтылық пен өзара құрметті сақтау, діни ақпаратты дұрыс қабылдау және күмәнді діни ағымдардың ықпалына түспеудің маңыздылығын түсіндірді. Әсіресе әлеуметтік желілер арқылы таралатын діни мазмұндағы ақпараттарға сақтықпен қарау, арандатушылық сипаттағы материалдарға ермеу және кез келген күмәнді мәліметті мамандармен кеңесе отырып саралау қажеттігі айтылды.
Сонымен қатар жастарға қоғамдық келісімнің тек мемлекеттік органдардың ғана емес, әрбір азаматтың ортақ жауапкершілігі екені түсіндірілді. Қазақстандағы түрлі этнос өкілдерінің бейбітшілік пен өзара сыйластық жағдайында өмір сүруі – елдегі тұрақтылықтың маңызды көрсеткіштерінің бірі. Осы орайда жастардың бойында толеранттылық, жауапкершілік, өзге мәдениет пен дәстүрге құрметпен қарау секілді құндылықтарды қалыптастырудың маңызы атап өтілді.
Мамандар жастарды өз құқықтары мен міндеттерін білуге, қоғамдық өмірге белсенді араласуға және кез келген келеңсіз жағдайдың алдын алуға шақырды. Ашық форматта өткен кездесу барысында студенттер өздерін қызықтырған сұрақтарын қойып, мамандардан нақты жауаптар алды. Бұл өз кезегінде жастардың көкейіндегі мәселелерді еркін талқылап, қажетті ақпаратты тікелей сала мамандарынан алуына мүмкіндік берді.
Іс-шара жастардың құқықтық және діни сауаттылығын арттыруға, этносаралық келісім құндылықтарын дәріптеуге және қоғамдағы тұрақтылықты нығайтуға бағытталды. Осындай ақпараттық-түсіндіру кездесулерін тұрақты өткізу жастардың теріс идеологиялық ықпалдарға қарсы иммунитетін қалыптастырып, олардың саналы әрі жауапты азамат болып қалыптасуына ықпал етеді.
