Абай Құнанбаев атындағы мектепте Қазақстан халқының тілдері күніне орай «Тілмен тоғысқан тағдырлар» тақырыбында дөңгелек үстел өтті.
Іс-шараның басты мақсаты – тілді ұлттар мен ұлыстарды ұйыстыратын ортақ құндылық ретінде дәріптеу, мемлекеттік тілдің мәртебесін арттыру және қоғамдағы тілдік татулықты нығайту. Сонымен қатар кездесудің негізгі міндеттерінің бірі – жас ұрпаққа ана тілі мен мемлекеттік тілдің қадір-қасиетін түсіндіру, тіл арқылы ұлттық мәдениет пен салт-дәстүрді құрметтеуге баулу. Себебі тіл – халықтың өткенін бүгінмен жалғап, болашаққа жеткізетін рухани мұра.
Дөңгелек үстелге Шымкент қалалық түрік этномәдени бірлестігінің белсенді мүшесі Оспанов Мейрамбек Хаму оглы қатысып, тілдің қоғамды біріктірудегі маңызы жөнінде ой-пікірін ортаға салды.
«Тіл – халықтың рухани болмысы мен мәдениетін айшықтайтын басты құндылықтардың бірі. Бүгінде елімізде әр этностың ана тілі мен мәдениетін сақтап, дамытуына барлық жағдай жасалған. Ал мемлекеттік тілді білу және оның қоғамдық қолданыс аясын кеңейту – баршамызға ортақ міндет. Осындай мазмұнды кездесулердің өскелең ұрпаққа берері мол. Жастардың мемлекеттік тілге деген қызығушылығын арттырып, тіл мен мәдениетті құрметтеуге тәрбиелеу – ортақ парызымыз», – деді Оспанов Мейрамбек Хаму оглы.
Кездесу барысында тіл мен мәдениеттің сабақтастығы, мемлекеттік тілдің қоғамды біріктірудегі рөлі және көпэтносты Қазақстандағы тілдік келісім мәселелері кеңінен талқыланды. Қатысушылар еліміздегі түрлі этнос өкілдерінің өз ана тілін сақтай отырып, мемлекеттік тілді құрметтеп, оны күнделікті өмірде қолдануы ел бірлігін нығайтудың маңызды тетігі екенін атап өтті.
Дөңгелек үстел барысында оқушылар да белсенділік танытып, тілдің адам өміріндегі орны, бірнеше тілді меңгерудің артықшылықтары және тілге құрмет көрсету туралы өз ойларын ортаға салды. Пікір алмасу кезінде әр тілдің өзіндік ерекшелігі мен құндылығы бар екені айтылып, өзге тіл мен мәдениетке құрметпен қарау өзара түсіністік пен достықты қалыптастыратыны сөз болды.
Мұндай кездесулердің өскелең ұрпақ үшін тәрбиелік мәні зор. Себебі оқушылар тіл мәселесін тек теориялық тұрғыдан емес, қоғам өмірімен байланыстыра отырып түсінеді. Әсіресе әртүрлі этнос өкілдерімен ашық пікір алмасу олардың толеранттылық, сыйластық және азаматтық жауапкершілік қасиеттерін қалыптастыруға ықпал етеді.
Жиын соңында қатысушылар тілге деген құрмет әр адамның күнделікті ісінен көрінуі керектігін атап өтті. Мемлекеттік тілдің қолданыс аясын кеңейту, оның мәртебесін арттыру және тілдік татулықты сақтау – баршаға ортақ міндет. Тіл арқылы тоғысқан тағдырлар ел ішіндегі бірлік пен ынтымақтың берік негізіне айналып, Қазақстандағы достық пен өзара құрметтің жарқын үлгісін көрсетеді.
