Шымкент қалалық «Қоғамдық келісім» КММ жанындағы «Барбанг» күрді этномәдени бірлестігінің мүшелері мен қалалық белсенді жастардың қатысуымен «Жаңа Конституция – ел болашағының бастауы» тақырыбында пікір алмасу алаңы өтті. Іс-шараның негізгі мақсаты – Конституцияның қоғам өміріндегі айрықша маңызын кеңінен насихаттау, азаматтардың құқықтық мәдениетін арттыру, заң үстемдігі қағидаттарын дәріптеу және жастардың ел болашағына деген жауапкершілік сезімін нығайту.
Кездесуге этномәдени бірлестік мүшелері мен белсенді жастар қатысып, Ата Заңның қоғамдағы орны, азаматтардың құқықтары мен міндеттері және қоғамдық келісімді нығайту мәселелері бойынша пікір алмасты. Қатысушылар Конституцияның мемлекет пен қоғам арасындағы өзара қарым-қатынастың құқықтық негізін қалыптастыратынын атап өтті.
Кездесуді қалалық «Барбанг» күрді этномәдени бірлестігінің төрағасы Исмат Камалович Сулейманов модератор ретінде жүргізді. Ол өз сөзінде Конституцияның мемлекеттің орнықты дамуы мен қоғамдық келісімнің берік тұғыры екенін атап өтіп, Ата Заңның әрбір азаматтың құқықтары мен бостандықтарының кепілі ғана емес, елдің бірлігі мен тұрақты дамуының басты негізі екеніне тоқталды.
– Конституцияны құрметтеу – заң талаптарын орындаумен ғана шектелмейді. Ол елдің болашағына жауапкершілікпен қарау, өз құқықтарыңмен қатар міндеттеріңді де түсіну және қоғамдағы өзара сыйластықты сақтау деген сөз. Әсіресе жастардың құқықтық сауатты, белсенді әрі жауапты азамат болып қалыптасуы ел дамуы үшін маңызды, – деген пікір айтылды.
Баяндамашылар Айлин Камрановна Мусаилова мен Тахир Камалович Сулейманов Конституцияда айқындалған негізгі қағидаттар, азаматтық жауапкершілік, заңға құрмет және құқықтық сананы қалыптастыру мәселелері төңірегінде мазмұнды баяндама жасады. Олар азаматтардың өз құқықтары мен міндеттерін білуі құқықтық мәдениетті қалыптастырудың негізгі шарттарының бірі екенін атап өтті.
Сонымен қатар жастардың қоғамдық белсенділігі мен елдің өркендеуіне қосар үлесінің маңыздылығына ерекше назар аударылды. Жастардың білім алуға, еңбек етуге, қоғамдық бастамаларға қатысуға және елдің әлеуметтік дамуына үлес қосуға мүмкіндігі мол екені айтылды. Осы мүмкіндіктерді тиімді пайдалану азаматтық жауапкершілікпен тікелей байланысты екені сөз болды.
Пікір алмасу барысында қатысушылар Конституцияның қоғам өміріндегі рөлі, заң талаптарын сақтау мәдениеті және ортақ құндылықтарды дәріптеу мәселелері жөнінде өз ой-пікірлерін ортаға салып, мазмұнды әрі тағылымды диалог өрбітті. Әсіресе қоғамдық келісім, этносаралық татулық және ел бірлігін сақтау мәселелеріне мән берілді.
Қатысушылар Қазақстандағы түрлі этнос өкілдерін ортақ құндылықтар мен азаматтық жауапкершілік біріктіретінін атап өтті. Этномәдени бірлестіктердің қоғамдық келісімді нығайтуға, жастарды елжандылыққа тәрбиелеуге және өзара құрмет мәдениетін қалыптастыруға қосып отырған үлесі де сөз болды.
Кездесу қорытындысында Конституция қағидаттарын құрметтеу, құқықтық сауаттылықты арттыру, азаматтық жауапкершілікті нығайту және жастардың қоғамдық өмірге белсенді қатысуын қолдау бағытындағы жұмыстарды жалғастырудың маңыздылығы атап өтілді. Пікір алмасу алаңы қатысушылардың құқықтық мәдениетін арттырып, ел болашағына ортақ жауапкершілік сезімін нығайтуға ықпал етті.
