Шымкент қаласындағы Достық үйінде «Ата Заң: халық таңдауы, ел болашағы» тақырыбында Шымкент қаласының «Қоғамдық келісім» КММ жанындағы Журналистер мен блогерлер клубының кезекті отырысы өтті. Кездесудің негізгі мақсаты – жаңа Конституцияның қоғам өміріндегі маңызын түсіндіру, конституциялық реформалардың жүзеге асырылу барысын талқылау және құқықтық мәдениетті нығайту бағытындағы ақпараттық жұмыстың өзекті мәселелерін саралау.
Жиынды Шымкент қаласының «Қоғамдық келісім» КММ жанындағы Журналистер мен блогерлер клубының төрағасы Әбдез Иманқұлов ашып, жүргізді. Отырысқа клуб мүшелері, сондай-ақ ҚР Мемлекеттік қызмет істері агенттігінің Шымкент қаласы бойынша департаментінің бас маманы Махаббат Мамауджанова қатысты.
Кездесу барысында Конституцияның қоғам мен мемлекет өміріндегі орнына, азаматтардың құқықтары мен бостандықтарын қамтамасыз етудегі маңызына ерекше назар аударылды. Қатысушылар конституциялық реформалардың негізгі бағыттары, мемлекеттік басқару жүйесіндегі жаңашылдықтар және қоғам мен мемлекет арасындағы тиімді диалогты дамыту мәселелері жөнінде пікір алмасты.
Жиында сөз алған клуб төрағасы Әбдез Рахманұлы журналистер мен блогерлердің қоғамдық ақпарат кеңістігіндегі жауапкершілігіне тоқталды.
– Журналистер мен блогерлер – қоғам мен мемлекет арасындағы ақпараттық байланысты нығайтатын маңызды күш. Сондықтан жаңа Конституцияның мәні мен маңызын халыққа жан-жақты түсіндіру, құқықтық мәдениетті қалыптастыру және қоғамдағы оң өзгерістерді шынайы әрі сапалы ақпарат арқылы жеткізу – баршамызға ортақ міндет. Бүгінгі кездесу осы бағыттағы өзара тәжірибе алмасуға және ақпараттық-түсіндіру жұмыстарын одан әрі жетілдіруге ықпал етеді деп сенемін, – деді Әбдез Рахманұлы.
Қатысушылар қазіргі ақпараттық кеңістікте Конституция мен заңнамалық өзгерістер туралы ақпаратты халыққа түсінікті әрі нақты жеткізудің маңыздылығын атап өтті. Әсіресе әлеуметтік желілердің қоғамдық пікір қалыптастырудағы ықпалы артып отырған жағдайда журналистер мен блогерлердің ақпаратты тексеріп, дереккөзге сүйене отырып таратуы маңызды екені айтылды.
Сонымен қатар құқықтық сауаттылықты арттыру мәселесі талқыланды. Азаматтардың өз құқықтары мен міндеттерін білуі, заң талаптарын құрметтеуі және мемлекеттік реформалардың мәнін дұрыс түсінуі қоғамдағы жауапкершілік пен өзара сенімді нығайтуға ықпал ететіні сөз болды.
Жиында ақпараттық-түсіндіру жұмыстарының сапасын арттыру, конституциялық өзгерістерді қарапайым әрі түсінікті тілде түсіндіру, қоғамдық маңызы бар тақырыптарды жан-жақты қамту бойынша ұсыныстар айтылды. Клуб мүшелері өз тәжірибелерімен бөлісіп, алдағы ақпараттық жұмыстардың бағыттарын талқылады.
Жиын соңында қатысушылар конституциялық реформалардың мәні мен маңызын халыққа кеңінен түсіндіру, құқықтық мәдениетті арттыру және қоғамдағы оң өзгерістерді сапалы ақпарат арқылы насихаттау бағытындағы жұмыстарды жүйелі түрде жалғастырудың маңыздылығын атап өтті.
