Алматы қаласында Қазақстандағы Қытай тауарларының 21-ші көрмесінің салтанатты ашылу рәсімі өтті. Түркістан облысы халықаралық көрменің басты қонағы ретінде шақырылды.
Ауқымды іс-шараға Қытай Халық Республикасының мемлекеттік органдары мен өңірлік әкімшіліктерінің, бизнес қауымдастықтарының өкілдері, сондай-ақ Қазақстан және Орталық Азия елдерінің мемлекеттік мекемелері, жүздеген кәсіпорын мен іскерлік қауымдастық өкілдері қатысты.
Көрмеге Түркістан облысының делегациясы қатысып, оның құрамында Түркістан облысы Кәсіпкерлер палатасының директоры Асылан Ибадуллаев болды. Іс-шара аясында өңірдің инвестициялық мүмкіндіктері, өндірістік әлеуеті, экспорттық өнімдері мен бірлескен жобаларды жүзеге асыруға қолайлы бағыттары таныстырылды.
Көрменің ашылуында сөз сөйлегендер ұйымдастырушыларға өңірге көрсетілген сенім үшін алғыс білдіріп, бұл мәртебе Түркістан облысының инвестициялық мүмкіндіктеріне берілген жоғары баға әрі Қазақстан мен Қытай арасындағы өңіраралық ынтымақтастықтың нығайып келе жатқанының айқын дәлелі екенін атап өтті.
Сондай-ақ өңірдің инвестициялық мүмкіндіктері таныстырылып, жүзеге асырылып жатқан жобалар мен инвесторларға ұсынылатын басым бағыттар туралы ақпарат берілді. Оның ішінде ауыл шаруашылығы өнімдерін қайта өңдеу, өнеркәсіп, құрылыс материалдарын өндіру, жаңартылатын энергия көздері, туризм және логистика салаларындағы ынтымақтастық мүмкіндіктеріне ерекше назар аударылды.
Айта кетейік, өңірдің қолайлы географиялық орналасуы, дамыған агроөнеркәсіптік кешені, өндірістік әлеуеті және дайын индустриялық аймақтары шетелдік инвесторлар үшін тиімді мүмкіндіктер ұсынады. Бүгінде ауыл шаруашылығы өнімдерін қайта өңдеу, өнеркәсіп, құрылыс материалдарын өндіру, жаңартылатын энергия көздері, туризм және логистика салаларында жаңа жобаларды бірлесіп жүзеге асыруға барлық алғышарт қалыптасқан.
Іс-шара Қазақстан мен Қытай арасындағы сауда-экономикалық ынтымақтастықты одан әрі нығайтіп, Түркістан облысына инвестиция тартуға және бірлескен жобаларды жүзеге асыруға жаңа серпін береді.
