Түркістан қаласындағы «Ұлы Дала Елі» орталығында Түркістан облысы бойынша Экономикалық тергеп-тексеру департаменті мен AMANAT партиясы жанындағы «Жастар Рухы» жастар қанаты Түркістан облыстық филиалының ұйымдастыруымен жастардың цифрлық сауаттылығын арттыруға, киберқауіпсіздік мәдениетін қалыптастыруға және заманауи технологиялардың қоғамдағы рөлін түсіндіруге бағытталған «Digital Jastar: Цифрлық қоғам. Заң мен Тәртіп» форумы өтті.
Форумға мемлекеттік органдардың өкілдері, қоғам белсенділері, жастар ұйымдарының мүшелері, студенттер мен ерікті жастар қатысты. Сондай-ақ іс-шараға «AMANAT» партиясы Түркістан облыстық филиалының төрағасы Алтынсары Дүйсенбекұлы Үмбетәлиев, «Жастар Рухы» жастар қанатының төрағасы Акерке Нұрғалиқызы Искандерова және Қазақстан КВН Одағының төрағасы Есентүгел Баймұханбетұлы Елеукен қатысып, жастармен ашық форматта пікір алмасты.
Іс-шара барысында Түркістан облысы бойынша Экономикалық тергеп-тексеру департаментінің басшысы Ерболат Темірболатұлы Балғабаев сөз сөйлеп, қаржылық қауіпсіздікті қамтамасыз ету, интернет-алаяқтықтың алдын алу және жастар арасында құқықтық мәдениетті қалыптастыру мәселелеріне ерекше тоқталды.
Өз сөзінде департамент басшысы цифрлық технологиялардың қарқынды дамуы қоғам өмірінің барлық саласына әсер етіп отырғанын атап өтіп, интернет кеңістігіндегі қауіп-қатерлерден қорғану үшін жастардың қаржылық және цифрлық сауаттылығын арттырудың маңыздылығына назар аударды. Сонымен қатар интернет-алаяқтық, қаржы пирамидалары, заңсыз қаржылық схемалар және дропперлік қызметтің қоғамға тигізетін зардаптары туралы айтып, жастарды заң мен тәртіп қағидаттарын берік ұстануға, қаржылық шешімдер қабылдау кезінде қырағылық танытуға шақырды.
Форум аясында робототехника және инновациялық стартаптар көрмесі ұйымдастырылып, қатысушыларға жас өнертапқыштар мен жастардың цифрлық жобалары таныстырылды. Көрмеде заманауи технологиялар, робототехникалық құрылғылар, IT-жобалар мен инновациялық бастамалар ұсынылып, жастардың ғылым мен технология саласына қызығушылығын арттыруға ерекше назар аударылды.
Сондай-ақ форум барысында цифрлық қоғамды дамыту, ақпараттық қауіпсіздік мәдениетін қалыптастыру, жастардың қоғамдық белсенділігі мен заманауи технологияларды тиімді пайдалану мәселелері талқыланды. Қатысушылар спикерлерге өз сұрақтарын қойып, өзекті тақырыптар бойынша еркін пікір алмасты.
«Digital Jastar: Цифрлық қоғам. Заң мен Тәртіп» форумы жастар арасында цифрлық мәдениетті қалыптастыруға, қаржылық және ақпараттық қауіпсіздік мәселелері бойынша түсіндіру жұмыстарын күшейтуге бағытталған маңызды диалог алаңына айналды.
