15 мамыр – Халықаралық отбасы күні қарсаңында Шымкент қаласы бойынша «Азаматтарға арналған үкімет» мемлекеттік корпорациясының филиалы неке тіркеу көрсеткіштеріне қатысты қызықты статистикалық мәліметтермен бөлісті.
Оқи отырыңыз...
2025 жылы Шымкент қаласында 7 658 неке тіркелген. Ал 2026 жылдың алғашқы төрт айының өзінде 2 134 жұп ресми түрде отау құрған.
Сонымен қатар, филиалдың мәліметінше, шетел азаматтарымен неке тіркеу тенденциясы байқалады. Мәселен, 2025 жылы қалада шетел азаматтарымен 303 неке тіркелсе, 2026 жылдың басынан бері 101 жұп заңды неке рәсімдеген.
Неке – әр адамның өміріндегі маңызды кезең, ал шетел азаматымен некеге тұру үшін тараптар қажетті құжаттарды алдын ала дайындауы қажет. Атап айтқанда, екі азаматтың жеке басын куәландыратын құжаттары, сондай-ақ шетелдік азаматтың өз елінің уәкілетті органы берген некеге тұруға құқық қабілеттілігі туралы анықтамасы ұсынылады. Бұл анықтамаға міндетті түрде апостиль қойылып, қазақ немесе орыс тіліне аударылып, нотариалды түрде куәландырылуы тиіс.
«Әрбір неке — екі адамның өміріндегі жаңа кезеңнің бастауы. Әсіресе, әртүрлі мемлекеттердің азаматтары отбасын құрып жатқан сәттердің бір бөлшегі болу біз үшін ерекше маңызды. Халықаралық отбасы күні отбасы құндылықтары мен махаббаттың ұлт пен қашықтыққа қарамастан адамдарды біріктіретінін тағы бір мәрте дәлелдейді», — деді Шымкент қаласы бойынша «Азаматтарға арналған үкімет» филиалы директорының орынбасары Мария Турганбаева.
Еске сала кетейік, шетел азаматымен некеге тұру туралы өтініш АХАТ бөліміне жазбаша түрде тікелей беріледі. Өтінішті қарау мерзімі — 15 күнтізбелік күн. Сонымен қатар, жас жұбайлар салтанатты неке қию рәсіміне қосымша тапсырыс бере алады. Салтанатты рәсімді АХАТ бөлімінің қызметкерлері ұйымдастырып, айтулы күннің ерекше атмосферасын қалыптастырады.
