Түркістан төрінде өткен Түркі мемлекеттері ұйымының бейресми саммиті – тек халықаралық деңгейдегі маңызды жиын ғана емес, күллі түркі әлемінің рухани байланысын бекемдеген тарихи басқосу болды. Мемлекет басшысы Қасым-Жомарт Тоқаев жиын қорытындысында Түркістан облысының атқарған жұмысына жоғары баға беріп, облыс әкімі Нұралхан Көшеров бастаған азаматтарға ризашылығын білдірді.
Бұл – қасиетті Түркістанның халықаралық деңгейдегі іс-шараларды жоғары дәрежеде өткізе алатын әлеуетін тағы бір мәрте дәлелдеген маңызды оқиға. Саммитке келген мәртебелі меймандардың көне шаһардың тазалығы мен көркейген келбетіне, жасыл желекке бөленген көшелері мен сапалы жолдарына оң бағасын беруі – өңірде атқарылып жатқан жүйелі жұмыстың нәтижесі.
Президент Түркістанды тек еліміздің емес, тұтас түркі дүниесінің рухани жауһары ретінде дамытуға ерекше мән беру қажеттігін атап өтті. Сонымен қатар ел абыройын асқақтатуға үлес қосқан мемлекеттік қызметкерлерге, құқық қорғау органдарының өкілдеріне, коммуналдық сала мамандарына, еріктілер мен белсенді азаматтарға құрмет көрсетілетіні – адал еңбекке берілген әділ баға деп білеміз.
Түркістанның бүгінгі келбеті – бірліктің, еңбекқорлықтың және елдік мүддеге деген жанашырлықтың көрінісі. Осындай игі бастамалар қасиетті шаһардың беделін одан әрі арттырып, халықаралық деңгейдегі маңызды орталыққа айналуына жол аша беретініне сенім мол.
