2026 жылғы 15 мамырда түркі әлемінің рухани астанасы – Түркістан қаласында Түркі мемлекеттері ұйымына (ТМҰ) мүше елдер басшыларының бейресми саммиті өтеді. Ауқымды халықаралық жиын қарсаңында шаһарда қаланың туристік әлеуетін арттыруға бағытталған бірқатар маңызды жобалар жүзеге асырылып, Түркістан жаңа келбетке ие болуда.
Саммит алдында Түркістан қаласына кіреберіс аумақта қасиетті тайқазан орнатылды. Тайқазан – тек сәулеттік нысан ғана емес, ол түркі халықтарының бірлігі мен ортақ рухани тамырын айқындайтын терең символ. Молшылық пен берекенің белгісі саналатын бұл тарихи бейне Түркістанның туристік брендін қалыптастыруда ерекше орын алады. Әуеден түсірілген кезде тайқазанның жанынан Түркі мемлекеттері ұйымының туы көрініп, түркі елдерінің ынтымақтастығын бейнелейтін тұтас композицияны қалыптастырады.
Қала билігінің мәліметінше, тайқазан орнатылған аумақ арнайы туристік көрікті орынға айналмақ. Мұнда келушілер үшін демалыс аймақтары, ақпараттық орталықтар және фотоаймақтар қарастырылып, жаңа туристік маршруттар қалыптастырылады. Бұл шешім Түркістанға келетін ішкі және шетелдік туристер ағынын арттыруға бағытталған. Сонымен қатар тайқазан маңында түрлі мәдени-танымдық іс-шаралар, этнофестивальдер мен ашық аспан астындағы көрмелер өткізу жоспарланып отыр.
Түркістанда туризмді дамытуға бағытталған тағы бір ірі жоба – жаңа этно-туристік кешеннің салынуы. Кешеннің басты архитектуралық нысаны – қазақтың дәстүрлі киіз үйі үлгісінде бой көтерген алып құрылыс. Оның диаметрі 31 метр, биіктігі 15,5 метр, жалпы ауданы 707 шаршы метрді құрайды. Бұл ерекше нысан бір мезетте жүздеген қонақты қабылдап, мәдени іс-шаралар, форумдар, көрмелер мен этнофестивальдер өткізуге мүмкіндік береді.
Алып киіз үйдің сәулеттік шешімі ұлттық мәдениет пен заманауи туризм индустриясын үйлестіруге бағытталған. Ішкі кеңістік ұлттық нақыштағы безендірулермен әрленіп, келушілерге қазақ халқының тарихы мен мәдениетін терең сезінуге мүмкіндік береді. Мұндай форматтағы нысан Түркістанды этнотуризм орталығы ретінде дамытуда маңызды рөл атқарады.
Кешен аумағында шағын киіз үйлер де орналастырылған. Олар түркі әлеміне ортақ мәдени мұраны таныстыруға арналған этноауыл форматында жұмыс істейді. Мұнда туристер әртүрлі елдердің ұлттық дәстүрімен танысып, қолөнер бұйымдарын көріп, дәстүрлі тағамдардан дәм тата алады. Бұл өз кезегінде Түркістанды көпқырлы мәдени тәжірибе ұсынатын халықаралық туристік орталық ретінде танытады.
Соңғы жылдары Түркістан қаласында туризм инфрақұрылымын дамытуға ерекше көңіл бөлініп келеді. Жаңа қонақүйлер, мәдени орталықтар, демалыс аймақтары мен заманауи қоғамдық кеңістіктер бой көтеруде. Тайқазан сияқты символдық нысандар мен этно-туристік кешендер қала брендіне айналып, Түркістанның тарихи-рухани орталық ретіндегі мәртебесін одан әрі нығайтып отыр.
Туризм саласындағы бұл бастамалар Түркістанды тек тарихи қала ретінде ғана емес, сонымен қатар заманауи халықаралық туристік бағыт ретінде дамытуға жол ашуда. Сарапшылардың пікірінше, мұндай жобалар шетелдік туристердің қызығушылығын арттырып, өңір экономикасына да оң әсер етеді.
Аталған жобалар Түркістан облысының әкімі Нұралхан Көшеровтің төрағалығымен өткен сәулеттік кеңестерде бірнеше рет талқыланып, жан-жақты сараптамадан өтті. Нәтижесінде қаланың туристік әлеуетін күшейтуге бағытталған нақты шешімдер қабылданып, қысқа мерзімде жаңа нысандар пайдалануға берілді.
Жалпы алғанда, қасиетті тайқазан мен этно-туристік кешен Түркістанның жаңа туристік келбетін қалыптастыратын маңызды жобаларға айналып отыр. Олар түркі әлемінің рухани бірлігін көрсетіп қана қоймай, қаланы халықаралық деңгейдегі мәдени-туристік орталық ретінде дамытуға серпін береді.
