Шымкент қаласында тұрғын үй құрылысы мен халықты баспанамен қамту бағытында жүйелі әрі ауқымды жұмыстар атқарылуда. Өткен жылы қалада жалпы құны 142,4 млрд теңгені құрайтын 118 нысанның құрылысы жүргізілді. Оның ішінде 67 нысан толық аяқталып, пайдалануға берілді, ал 51 нысанның құрылысы кезең-кезеңімен жалғасуда.
Қала халқының өсуіне байланысты көппәтерлі тұрғын үй құрылысына ерекше басымдық берілді. Тұран, Бозарық және Ақжайық шағынаудандарында 66 көпқабатты тұрғын үй салынды. Нәтижесінде 34 тұрғын үй пайдалануға беріліп, 2 575 отбасы жаңа баспанаға қол жеткізді. Тапсырылған тұрғын үйлердің жалпы аумағы 203,9 мың шаршы метрді құрады.
Әлеуметтік осал санаттағы азаматтарды тұрғын үймен қамту мақсатында 1 523 пәтер сатып алу жоспарланып, оның 1 374-і тұрғындарға үлестірілді. Қалған пәтерлерді сатып алу жұмыстары жалғасуда. Сонымен қатар, биыл 119 мың шаршы метрді құрайтын 1 458 пәтер тұрғын үй кезегінде тұрған азаматтарға беріледі деп жоспарланған.
Тұрғын үй қорының сапасын арттыру да басты назарда. Қазіргі таңда 197 көпқабатты тұрғын үй кепілдік мерзімінде тұр. Былтыр анықталған 466 кемшілік мердігерлер тарапынан толық жойылды. Құрылыс сапасын бұзған мердігер ұйымдарға заң аясында айыппұлдар салынып, саладағы жауапкершілік күшейтілді.
Бұл жұмыстар Шымкент қаласында тұрғындарды қолжетімді, сапалы әрі қауіпсіз баспанамен қамтамасыз етуге бағытталған нақты қадамдардың нәтижесі болып табылады.
