Шымкент қаласы Абай ауданы әкімінің орынбасары Жеңіс Жауғаштыұлы Садырханов Қайнарбұлақ тұрғын алабындағы инженерлік және коммуналдық мәселелердің шешілу барысын бақылап, жергілікті тұрғындармен кездесті. Кездесу барысында аудан әкімдігі өкілдері халықпен ашық пікір алмасып, өзекті мәселелердің шешу жолдарын талқылады.
Тұрғындардың басты сауалының бірі — табиғи газ жүйесіне қосылу мәселесі болды. Қайнарбұлақ елді мекенінде газ желісін тарту жұмыстары кезең-кезеңімен жүргізіліп жатыр. Осыған байланысты аудан әкімінің орынбасары тұрғындарға түсіндіру жұмыстарын жүргізіп, газдандыру процесінің тәртібі мен мерзімдерін егжей-тегжейлі түсіндірді. Сондай-ақ, тұрғындарды заңды келісімшарт арқылы қосылуға және қауіпсіздік талаптарын қатаң сақтауға шақырды.
Бұдан бөлек, Жеңіс Жауғаштыұлы Қайнарбұлақ тұрғын алабы аумағындағы асфальт төсеу жұмыстарының барысын аралап көрді. Аралау кезінде ол құрылыс сапасына ерекше назар аударып, мердігер ұйымдардың жұмысын бағалады. Асфальт төселіп жатқан көшелердің сапалық талаптарға сай болуы, жол жиегінің тегіс түсуі және су ағу жүйесінің дұрыс орнатылуы – басты бақылауда екенін атап өтті.
Аудан әкімінің орынбасары мердігер мекемелерге нақты тапсырмалар беріп, жұмыс сапасын күшейту мен белгіленген мерзімде аяқтау қажеттігін қадап айтты. Сонымен қатар, құрылыс барысында тұрғындардың қауіпсіздігін қамтамасыз ету, жол жиегіндегі шаң-тозаңды азайту және абаттандыру жұмыстарын қатар жүргізу туралы ескертті.
Қайнарбұлақ тұрғын алабы – Абай ауданының қарқынды дамып келе жатқан аумақтарының бірі. Мұнда соңғы жылдары инженерлік инфрақұрылым, жол және әлеуметтік нысандар құрылысы белсенді жүріп жатыр. Тұрғындардың өмір сүру сапасын арттыру мақсатында аумақ кезең-кезеңімен жарықтандырылып, көше жолдары асфальтталып, қоғамдық кеңістіктер абаттандырылуда.
Сонымен қатар, аудан әкімдігі тарапынан тұрғындармен кері байланыс жүйесі күшейтілуде. Әлеуметтік желілер мен қабылдау алаңдары арқылы келіп түскен өтініштерге жедел әрекет ету, жауапты мекемелердің жұмысын үйлестіру және әрбір мәселенің нақты шешімін табу бағытында жүйелі жұмыстар жалғасуда.
Абай ауданы әкімдігі тұрғындармен тұрақты байланыс орнатып, олардың ұсыныс-пікірлерін назарға ала отырып, қала экожүйесін жақсарту және «Таза Қазақстан» тұжырымдамасын іске асыру бағытындағы жұмыстарды жүйелі түрде жалғастыруда.
