Шымкент қаласының Абай ауданында тұрғындардың өмір сүру сапасын арттыру, қауіпсіз әрі қолайлы инфрақұрылым қалыптастыру бағытында жүйелі жұмыстар жүргізілуде. Аудан әкімі Сұлтанхан Шәкір Асылханұлының айтуынша, басты мақсат – тұрғындардың тұрмысын жақсартып, заманауи стандарттарға сай өмір сүру жағдайын қамтамасыз ету.
Соңғы жылдары аудан аумағында жарықтандыру саласында айтарлықтай серпін байқалады. Егер 2024 жылға дейін аудан көшелерінің бар болғаны 15 пайызы ғана жарықтандырылған болса, биыл бұл көрсеткіш бірнеше есеге артқан. 2025 жылдың қорытындысына дейін 954 көше жарықтандырылып, аудан аумағындағы барлық көшелерге жарық шамдарын орнату жоспарланып отыр. Бұл бағыттағы жұмыстар қала әкімінің тапсырмасы аясында жүзеге асуда және тұрғындардың қауіпсіздігін арттыруға, қоғамдық тәртіпті күшейтуге, сондай-ақ түнгі уақытта қозғалысқа қолайлы жағдай жасауға мүмкіндік береді.
Жарықтандырумен қатар, аудан аумағында жылу маусымына дайындық шаралары да қарқынды жүріп жатыр. 255 көпқабатты тұрғын үйдің барлығы қысқы маусымға толық әзірленді. «ҚуатжылуОрталық» мекемесі арқылы орталық жылу жүйесіне қосылған барлық нысандарда қажетті сығымдау және жөндеу жұмыстары жүргізілді. Инженерлік желілер мен қазандықтар тексеріліп, ақаулар дер кезінде жойылған.
Білім және денсаулық сақтау нысандары да назардан тыс қалған жоқ. Қазіргі таңда 32 мектеп, 9 балабақша және 13 медициналық ұйымның жылу жүйелері толығымен дайын. Бұл — жаңа оқу маусымы мен алдағы қыс мезгілінде әлеуметтік нысандардың қалыпты жұмыс істеуіне кепіл болмақ.
Ауданның абаттандыру бағытындағы жұмыстары да өз жалғасын табуда. Тұрғындардың қауіпсіздігі мен ыңғайлылығын қамтамасыз ету мақсатында аулалар мен арықтардың жиектерін қоршау, шағын көпірлер салу, аяқжолдарды ретке келтіру секілді жұмыстар кезең-кезеңімен жүзеге асырылып келеді. Мұндай шаралар әсіресе жаяу жүргіншілер мен балалар үшін қауіпсіз ортаны қамтамасыз етуге бағытталған.
Сұлтанхан Шәкір Асылханұлы атап өткендей, Абай ауданында қолға алынған барлық жұмыстардың түпкі мақсаты – тұрғындардың жайлы өмір сүруіне жағдай жасау. «Инженерлік инфрақұрылым, көше жарықтандыру, жылу жүйесін жаңғырту – бұл тек коммуналдық сала емес, бұл – тұрғындардың өмір сапасына тікелей әсер ететін әлеуметтік маңызы бар бағыттар. Сондықтан біз бұл салаларда жүйелі әрі нәтижелі жұмыс жүргізуді жалғастырамыз», – деді аудан әкімі.
Алдағы уақытта аудан әкімдігі қала әкімінің тапсырмасына сәйкес, жарықтандыру мен жылу жүйелерін толық қамтуға, инфрақұрылымды жетілдіруге және тұрғындар үшін қауіпсіз, қолайлы ортаны қалыптастыруға бағытталған кешенді жұмыстарды жалғастырмақ.
