Шымкент қаласының Абай ауданында абаттандыру мен көгалдандыру бағытындағы жұмыстар жүйелі түрде жүзеге асып келеді. Аудан тұрғындарының өмір сапасын арттырып, қолайлы орта қалыптастыру — жергілікті әкімдік жұмысының басым бағыттарының бірі. Соңғы жылдары бұл салада айтарлықтай өзгерістер мен оң нәтижелер байқалуда.
«Халық қатысатын бюджет» жобасы аясында аудан аумағында биылдың өзінде 1,9 млрд теңгеден астам қаражат бөлінді. Бұл қаржы халықтың ұсынысы мен қажеттілігін ескере отырып, әлеуметтік маңызы бар жобаларды іске асыруға бағытталды. Соның нәтижесінде 16 заманауи ойын алаңшасы мен 3 спорт алаңшасы салынды, сондай-ақ 5 гүлзар бой көтеріп, тұрғындар демалатын жаңа орындарға айналды. Бұдан бөлек, аудан көшелеріне 34 мың шаршы метр жаңа аяқжол төселіп, жаяу жүргіншілердің қауіпсіз әрі ыңғайлы қозғалысына жағдай жасалды.
Көгалдандыру ісі де басты назардан тыс қалған жоқ. Қала экологиясын жақсарту және тұрғындарға жайлы орта қалыптастыру мақсатында биылғы жылы 5 жаңа гүлзардың құрылысы қолға алынды. Олардың кейбірі бүгінде пайдалануға беріліп, тұрғындардың сүйікті демалыс аймағына айналып отыр. Сонымен қатар, «Асар» шағын ауданында тозығы жеткен 4 гүлзар қайта жаңғыртылуда. Бұл нысандар толық аяқталғанда ауданның көркі одан әрі көркейіп, экологиялық жағдай айтарлықтай жақсара түспек.
Абаттандыру шараларымен қатар, аудан аумағында тазалық пен тәртіпті сақтау мақсатында жүйелі сенбіліктер өткізіліп келеді. Жыл басынан бері 37 рет ұйымдастырылған сенбілікке 30 мыңнан астам адам қатысқан. Мұндай ауқымды қоғамдық жұмыстарға тұрғындардың белсенді түрде араласуы — экологиялық мәдениеттің қалыптасып келе жатқанын айғақтайды.
Балалардың қауіпсіз әрі жайлы ортада ойнауы да аудан әкімдігі назарындағы маңызды мәселе. Осы мақсатта 63 ескі ойын алаңшасының 45-і жаңартылып, заманауи құралдармен жабдықталды. Қалғандары кезең-кезеңімен жөндеуден өтуде. Бұл шаралар аудан балаларының бос уақытын тиімді өткізіп, салауатты өмір салтын ұстануға ықпал етеді.
Жалпы, Абай ауданында абаттандыру мен көгалдандыру бағытындағы жұмыстар жыл сайын қарқын алып келеді. Халықтың игілігіне бағытталған мұндай жобалар алдағы уақытта да жалғасын табады. Аудан басшылығы тұрғындармен кері байланыс орнатып, ұсыныстарды ескере отырып, жасыл желекке бай, экологиялық таза әрі тартымды орта қалыптастыруды көздеп отыр.
