Шымкент қаласының әкімі Ғабит Сыздықбековтің қатысуымен өткен көшпелі кездесу барысында Шымсити шағынауданының №20 үй тұрғындары бірқатар өзекті мәселелерді көтерді. Атап айтқанда, тұрғындар балалар мен жасөспірімдердің бос уақытын тиімді өткізуі үшін қауіпсіз әрі заманауи ойын және спорт алаңшаларын орнату қажеттігін жеткізді. Бұл ұсыныс қалалық және аудандық әкімдіктер тарапынан қолдау тауып, дереу назарға алынды.
Аталған мәселе бойынша Абай ауданына қарасты «Абай» коммуналдық мемлекеттік мекемесі тиісті зерттеу жүргізіп, алаңшаларды қайта жаңғырту жұмыстарына кірісті. Нәтижесінде, спорт және ойын алаңшалары толық жөндеуден өтіп, қазіргі заман талабына сай жаңартылды. Алаңшаларда қауіпсіздік талаптарына сәйкес резеңке төсеніштер төселіп, балалардың жас ерекшеліктеріне қарай ойын құрылғылары орнатылды. Сонымен қатар, спортпен шұғылданатын жасөспірімдерге арналған турник, жаттығу құрылғылары, кіші футбол және баскетбол алаңшалары да жаңартылып пайдалануға берілді.
Қазіргі таңда бұл нысандарды қалалық құрылыс басқармасынан Абай ауданы әкімдігінің теңгеріміне өткізу процесі жүргізіліп жатыр. Бұл – алаңшалардың сенімді басқаруға берілуін және олардың техникалық жағдайын жүйелі қадағалауды қамтамасыз етеді. Құжаттар әзірленіп, тиісті сараптамалар жасалуда.
Жалпы, аудан аумағында тұрғындардың сұранысына сай әлеуметтік инфрақұрылымдарды дамыту бағытындағы жұмыстар жүйелі жалғасып келеді. Тек Шымсити шағынауданында ғана емес, өзге де ықшамаудандарда балалар алаңшалары мен спорттық нысандар салынып, бұрыннан барлары жаңартылуда. Мұндай нысандар – балалардың денсаулығын нығайтуға, жастардың спортқа қызығушылығын арттыруға және отбасылардың сапалы демалысын ұйымдастыруға сеп болады.
Сонымен қатар, Абай ауданы әкімдігі мен қалалық құрылымдар арасында өзара ынтымақтастық күшейіп, тұрғындармен кері байланыс жүйесі жетілдірілуде. Көшпелі кездесулер, қоғамдық қабылдаулар арқылы халықтың ұсыныстары мен шағымдары дер кезінде қаралып, жауапты мекемелер тарапынан нақты шаралар қабылдануда.
Бұл бағыттағы жұмыстар алдағы уақытта да жалғасады. Абай ауданының әкімдігі тұрғындардың өмір сапасын жақсарту, қауіпсіз орта қалыптастыру және әлеуметтік игіліктерге қолжетімділікті арттыру мақсатында жаңа жобаларды кезең-кезеңімен жүзеге асыруды көздеп отыр.
