Шымкент қаласы Абай ауданы әкімдігінде азаматтарды жеке қабылдау шарасы кезекті рет ұйымдастырылып, тұрғындармен ашық диалог орнатылды. Қоғамның әлеуметтік белсенділігін арттыру, халықтың мұң-мұқтажына жедел назар аудару және өзекті мәселелерді шешу – бұл кездесулердің негізгі мақсаты.
Қабылдау барысында азаматтар тарапынан көтерілген мәселелердің қатарында көшелерді асфальттау, жаяу жүргіншілер жолын салу, балалар ойын алаңшаларын орнату және жөндеу, кәсіпкерлікті дамытуға қолдау көрсету, арық-атыз жүйесін ретке келтіру, жарықтандыру, қоғамдық көлік қатынасы, сонымен қатар тұрғын үйлердің маңын абаттандыру секілді көптеген сұрақтар болды. Сондай-ақ көпқабатты үйлердегі инженерлік инфрақұрылымға қатысты түйткілдер де назардан тыс қалмады.
Аудан әкімінің қабылдауына келген әрбір азаматтың ұсыныс-тілегі мұқият тыңдалып, мәселенің мән-жайына қарай жауапты сала басшыларына нақты тапсырмалар берілді. Кейбір мәселелер бойынша сол мезетте түсініктеме беріліп, шешу жолдары ұсынылды. Ал күрделі және қосымша зерделеуді қажет ететін жағдайлар бақылауға алынып, тиісті құрылымдарға жолданды.
Мысалы, жол инфрақұрылымына қатысты өтініштер бойынша тұрғындардың қатысуымен учаскелік тексерулер жүргізіліп, «Халық қатысатын бюджет» жобасы аясында келесі жылға нақты ұсыныстар енгізілетін болды. Бұл өз кезегінде шешім қабылдауда қоғамдық қатысуды күшейтіп, ашықтық пен әділдік принципін нығайтады.
Балалар ойын алаңшаларын салу мен жаңарту бағытында да нақты жоспарлар жасалды. Жауапты бөлімдерге жергілікті жерлерді тексеру, қауіпсіздік талаптарына сай келетін жабдықтармен қамтамасыз ету бойынша жобалар әзірлеу жүктелді. Сонымен қатар, тұрғындардан түскен ұсыныстардың негізінде аулаларда спорттық тренажерлер, жарық шамдары орнату мүмкіндіктері қарастырылады.
Кәсіпкерлікке қатысты мәселелерді көтерген азаматтарға қолданыстағы мемлекеттік бағдарламалар мен қолдау құралдары жөнінде толыққанды ақпарат беріліп, тиісті мекемелерге бағыттамалар ұсынылды. Жас кәсіпкерлер мен шағын бизнес иелеріне бизнес-жоспар дайындау, гранттарға құжат тапсыру тәртібі түсіндірілді.
Тұрғындармен кері байланысты нығайту, билік пен халық арасындағы сенімді арттыру – Абай ауданы әкімдігінің басты басымдықтарының бірі. Бұл тұрғыда әрбір қабылдау — тек есеп беру форматы емес, нақты істерге жол ашатын, тұрғындардың үніне құлақ асатын тиімді алаң ретінде қызмет етеді.
Жеке қабылдаудың қорытындысы бойынша аудан әкімі барлық өтініш-тілек пен шағымдардың назардан тыс қалмайтынын, олар бойынша жоспарлы жұмыстар жүргізілетінін атап өтті. Көтерілген мәселелердің орындалу барысы тікелей бақылауда болып, кезең-кезеңімен тұрғындарға хабарланатын болады.
Мұндай кездесулер алдағы уақытта да тұрақты түрде ұйымдастырылады. Себебі тұрғындардың күнделікті өмір сапасын арттыру мен қолайлы қалалық орта қалыптастыруда халықпен бірлесіп жұмыс істеудің маңызы зор.
