Журналист – қоғам айнасы, халық пен билік арасындағы алтын көпір. Ақпаратты дәл, шынайы жеткізу – әр журналистің басты мұраты. Олар күн демей, түн демей, ел үшін еңбек етеді. Сол еңбектің еленуі – үлкен мәртебе.
Бүгін Шымкент қаласында БАҚ қызметкерлері күні қарсаңында Қазақстан Журналистер одағының құрмет грамоталары табысталды. Жемісті еңбек етіп жүрген журналистердің маңдай тері мен шығармашылық ізденісі ескерусіз қалған жоқ.
«Қазақстанның құрметті журналисі» атағы белгілі қаламгер Балтабек Түйетаевқа берілді. Бұл — ұзақ жылдар бойғы табанды еңбектің лайықты бағалануы!
Сонымен қатар, азаматтық қоғаммен тығыз байланыста еңбек етіп, ел мен елді, халық пен билікті байланыстыруға үлес қосқан Шымкент қаласындағы №9 мамандандырылған өрт сөндіру бөлімінің бөлімше командирі Бекжан Уркинбаев Қазақстан Журналистер одағының “Алтын медалімен” марапатталды. Ол тек кәсіби маман ғана емес, өз тәжірибесін жас буынға үйретуден жалықпайтын, нағыз тәлімгер. Қарамағындағы әріптестері де оның адамгершілігі мен біліктілігін ерекше бағалайды.
Сондай-ақ, «Шымкент келбеті» газетінің жауапты хатшысы Замира Алдаберген мен тілшісі Салтанат Жамалдинова да Алғыс хатқа ие болды. Бұл – редакция ұжымының табанды еңбегіне берілген шынайы құрмет!
Барша марапат иелерін шын жүректен құттықтаймыз! Қаламдарыңыз мұқалмасын, ел үшін еткен еңбектеріңіз еселене берсін!
