Экологиялық тұрақтылықты сақтау және орман қорын ұлғайту – Түркістан облысы үшін басым бағыттардың бірі. Осы орайда облыс әкімінің орынбасары Нұрбол Тұрашбеков Ордабасы, Отырар және Созақ аудандарындағы Орман және жануарлар әлемін қорғау мекемелерінің басшыларымен кеңейтілген жұмыс мәжілісін өткізді. Жиында аталған мекемелердің атқарған жұмыстары сараланып, орманды қорғау мен өрт қауіпсіздігін күшейту мәселелері талқыланды.
Отырар орман мекемесі: ауқымды алқап, ауқымды жұмыс:
Мәжілісте алғаш сөз алған Отырар орман және жануарлар әлемін қорғау мекемесі басшысы мекеменің құрылымы мен жұмыс барысы туралы баяндады. Аталған мекеменің қарамағында төрт орманшылық бар: Балтакөл, Байырқұм, Қаратау және Шәуілдір. Жалпы орманшылықтардың жер қоры – 1 млн 55 мың гектар, оның ішінде 686 мың гектар – орманды алқаптар.
Мекемеде қазіргі таңда 30 гектар аумақта уақытша тұқымбақ жасақталып, онда 6 миллион түп сексеуіл көшеті өсіріліп жатыр. Бұдан бөлек, 15 гектар аумақты алып жатқан негізгі тұқымбақта түрлі ағаш және бұта түрлерінен 844 мың түп көшет бапталуда. Бұл көрсеткіштер алдағы жылдары өңірдегі орман көлемін едәуір ұлғайтуға сеп болмақ.
Сонымен қатар, жыл басынан бері мекеме тарапынан 94 рейдтік тексеру ұйымдастырылып, нәтижесінде 41 заң бұзушылық анықталған. Құқық бұзушыларға 2 млн 860 мың теңге көлемінде айыппұл салынып, соның 1 млн 287 мың теңгесі өндірілген. Бұл – табиғатты қорғау бағытында атқарылған нақты жұмыстардың нәтижесі.
Ордабасы ауданы: өрт қауіпсіздігі – басты назарда:
Бадам орман шаруашылығы да көшет өндіру ісіне белсенді түрде атсалысып келеді. Бүгінде бұл шаруашылық 12 гектар жерге тұқымбақ орналастырып, онда түрлі ағаш түрлерінің көшеттерін өсірумен айналысуда.
Алайда, мұнда да шешімін күткен мәселелер бар. Атап айтқанда, Боралдай орманшылығына өрт сөндіру станциясы мен арнайы өрт сөндіру көлігі қажет. Сонымен бірге, техникалар мен құрал-жабдықтарды сақтау үшін қосымша бастырма салу – күн тәртібіндегі өзекті тақырыптардың бірі. Бұл мәселе жиында егжей-тегжейлі талқыланып, тиісті шаралар қабылдау бойынша ұсыныстар берілді.
Созақ ауданы: сексеуіл егу және су жинау жүйесін дамыту:
Созақ ауданындағы орман шаруашылығы жұмыстары да жүйелі түрде жүргізілуде. Мұнда Созақ, Мойынқұм және Шолаққорған орманшылықтары қызмет атқарады. Жалпы жер көлемі – 1 млн 34 мың гектарды құрайды. Өткен жылы аталған орманшылықтар 2 мың гектарға түрлі ағаш көшеттерін отырғызған. Қазіргі таңда 20 гектар жерде сексеуіл, 2 гектар жерде қарағаш тұқымбағы өсірілуде.
Мекеме өкілі өңірдегі орман қоры жеріне арнайы су жинайтын орындар салудың маңыздылығын атап өтіп, бұл мәселе бойынша облыс әкімінің орынбасарынан қолдау сұрады. Себебі, су жеткіліксіздігі көшеттердің өсуіне кері әсерін тигізуі мүмкін. Бұл мәселе де мәжілісте жеке қарастырылып, шешу жолдары белгіленді.
Қауіпсіздік және орманды алқаптарды толықтыру – басым бағыт:
Кеңес соңында Нұрбол Тұрашбеков барлық орман мекемелерінің басшыларына нақты тапсырмалар берді. Атап айтқанда:
— Өрт қаупі жоғары аумақтарда бақылауды күшейту;
— Орман ішіндегі қауіпсіздік талаптарының қатаң сақталуын қамтамасыз ету;
— Орман қорын толықтыру жұмыстарын жандандыру, яғни көшет отырғызу, тұқымбақ көлемін ұлғайту;
— Су ресурстарын үнемді пайдалану және су инфрақұрылымын дамыту.
Жиын соңында нақты тапсырма-жоспар түзіліп, әрбір мәселенің орындалу мерзімі мен жауапты тұлғалары белгіленді.
Орман – табиғаттың қорғаны, климаттың тұрақтандырушысы әрі келешек ұрпаққа мирас болар баға жетпес байлық. Түркістан облысында осы құндылықты сақтау мен арттыру жолында нақты шаралар қолға алынып жатыр. Бұл – тек табиғатқа қамқорлық емес, елдің болашағына жасалған үлкен инвестиция. Алдағы уақытта да облыс басшылығы экологиялық тепе-теңдікті сақтау, өрт қауіпсіздігін күшейту, орман қорын ұлғайту жұмыстарын жүйелі түрде жалғастырады.
