Қазығұрт ауданында мемлекет басшысының “Таза Қазақстан” экологиялық бағдарламасы аясында ауқымды сенбілік ұйымдастырылды. Бұл жолғы тазалық шарасы Сарапхана ауылдық округіндегі “Мәңгілік Ел” саябағында өтті.
Аудан әкімі Азизхан Исмаиловтың тапсырмасына сәйкес, саябақ 13 секторға бөлініп, әр секторға ауыл округі әкімдіктері мен тиісті мекеме қызметкерлері жауапты етіп бекітілді. Бұл құрылым сенбіліктің ұйымшыл әрі тиімді өтуіне сеп болды.
Сенбілік барысында әрбір секторда белгіленген ұжымдар тазалық жұмыстарын қарқынды жүргізді. Атап айтқанда, қоқыстар жиналып шығарылды, арамшөптер шабылып, жасыл желек күтімге алынды. Ағаштар әктеліп, гүлзарлар тазартылды.
Аудан басшысы Азизхан Исмаилов сенбілік кезінде тазалық жұмыстары жүргізіліп жатқан аумақтарды аралап, атқарылып жатқан жұмыстардың барысымен танысты. Сонымен қатар, жауапты сала мамандарына нақты тапсырмалар жүктеп, тазалық пен тәртіпке баса мән беру қажеттігін атап өтті.
Сенбілікке мемлекеттік қызметкерлермен қатар, ауыл тұрғындары мен ерікті жастар да белсене қатысты. Олар үйлерінің маңайын, көшелер мен қоғамдық орындарды қоқыстан тазартып, ауданның көркеюіне өз үлестерін қосты.
Айта кету керек, дәл осындай сенбіліктер ауданға қарасты барлық ауылдық округтерде де өткізілді. Әрбір округ тұрғындары туған жердің тазалығы мен экологиялық қауіпсіздігіне бейжай қарамай, бір кісідей атсалысты.
