Отбасы – еліміздің мызғымас беріктігі мен болашағының қайнар көзі. Себебі тәрбиелі ұрпақтың ел мен жерге адал қызмет жасауы отбасындағы өнегеден бастау алады. Қазақ халқы үшін отбасы ұғымы қашаннан қасиетті болғандықтан «Отан – отбасынан басталады» деген аталы сөз қалған. Сондықтан да мемлекетіміздің басты міндеттерінің бірі — отбасы институтын қолдау және нығайту, отбасылық құндылықтарды, көп балалы отбасыларды, ана мен бала денсаулығын қорғау.
Отбасы құндылықтарын нығайту бағытында Түркістан облысында атқарылып жатқан жұмыстар жетерлік. Күні кеше Сарыағаш ауданы әкімінің міндетін атқарушы Алдияр Қозыбаев «Халықаралық отбасы күні» мерекесіне орай көпбалалы, отандасқандарына 40,50 және 60 жыл толған үлгілі отбасыларды сонымен қатар, жаңадан отау құрған жас отбасыларды арнайы құттықтады.
— Құрметті ағалар мен апалар, жас отбасылар! Баршаңызды отбасы күнімен шын жүректен құттықтаймын! Отбасында жарасым, сүйіспеншілік, мейірім болса ғана шаңырақ биік құрылып, керегесі кең болып, түтіні түзу ұшады. Сіздер отбасы құндылығын берік ұстап, мәуелі бәйтеректей тамырын кеңге жайған өнегелі отбасысыздар. Өмір жолдарыңызда көптеген маңызды қызметтерді абыроймен атқарып, алдыңғы буын – ағаларымыздың тәлімді тәжірибесін лайықты жалғастырып келесіздер.Сіздерге отбасылық бақыт, дендеріңізге саулық тілеймін, — деп аудан әкімінің міндетін атқарушы Алдияр Қозыбаев жиналған үлгілі отбасыларға арнайы сыйлықтар, алғыс хаттар мен гүл шоқтарын сыйлады.
Сондай-ақ, аудан әкімінің орынбасары мерекеге орай жаңадан отау көтерген жас отбасыларға неке куәлігі мен арнайы сыйлықтар табыстады. Жалпы ауданның 14 үлгілі отбасын құттықтады.
Кездесуге қатысқандар ағалардың атынан Жібек жолы ауылдық округінің тұрғыны, бірнеше ұл-қызды тәрбиелеп өсірген үлгілі, мерейлі отбасының ақсақалы Кендебай Қойлыбаев атамыз сөз алып, өздеріне көрсетілген құрмет үшін аудан әкімдігіне алғыстарын айтып, ауданның өсіп-өркендеуіне жемісті қызмет етуін тіледі.
Сонымен қатар, аудан әкімінің міндетін атқарушы Алдияр Қозыбаев аудандық орталық аурухананың перзентхана бөліміне арнайы барып, ана атанған жас аналарымызды мерекемен құттықтап бағалы сыйлықтар табыстады.
Сол сияқты Халықаралық отбасы күніне орай Төлеби ауданының ішкі саясат бөлімінің “Жастар ресурстық орталығы” КММ-нің ұйымдастыруымен үлгілі отбасыларды дәріптеу мақсатында «Мерейлі отбасы» байқауының қатысушысы Бекишовтар отбасын марапаттау рәсімі өткізілді.
Іс-шараға Аудандық ішкі саясат бөлімінің басшысы Ж.Абдиев, аудандық ақсақалдар кеңесінің төрағасы Ә.Шыңғысбаев, ҚХА жанындағы Төлеби аудандық өзбек этномәдени бірлестігінің төраға орынбасары А.Османов, ҚХА жанындағы Төлеби аудандық неміс этномәдени бірлестігінің төрайымы Л.Климентьевна, аудандық аналар кеңесінің төрайымы А.Рахишова және аналар алқасы мүшелерімен жас отбасылар қатысты.
Іс-шараның мақсаты: “Мерейлі отбасы” байқауының қатысушысы Бекишовар әулетінің ерең еңбектері мен жұмыс жолындағы жемістерін, отбасы құндылықтарын, бала тәрбиесін дәріптеу дұрыс бағыт бағдар беру және білімге баулуды жастарға, жас отбасыларға үлгі ретінде көрсету болды.
