Түркістан облысының Кентау қаласына қарасты Хантағы ауылының тұрғыны Бақыткүл Саттархан үшемді дүниеге әкелді. Үшемдердің екеуі ұл, біреуі — қыз. Оларға Бағым, Аңсар, Аслан есімдері қойылды. Үшемдер мерзімінен бұрын, жүктіліктің 29 аптасында дүниеге келген. Сәбилер 1.480, 1.380, 1.280 грамм салмақта дүние есігін ашты.
Бүгінде нәрестелер 2 айға жуық тексеру, күтіп-баптау жұмыстары бойынша дәрігерлердің бақылауында. Сондай-ақ, ана мен балалардың жағдайы бірқалыпты. 28 жастағы Бақыткүл Саттарханның айтуынша, ол тұңыш баласын 6 жыл күткен. Енді араға бір жыл салып үшемдер туылған. Бүгінде Ермахановтар отбасында үлкен қуаныш.
