Сауран ауданында қоршаған ортаны қорғау және экологиялық мәдениетті қалыптастыру мақсатында көгалдандыру және тазалық жұмыстары тұрақты жүргізіліп келеді. Бүгін «Таза Қазақстан» экологиялық акциясы аясында аудан көлемінде сенбілік жұмыстарына облыс әкімінің бірінші орынбасары Зұлфұхар Жолдасов, аудан әкімі Мақсат Таңғатаров арнайы қатысып, тал отырғызды.
Сонымен қатар, сенбілікке ақсақалдар, әжелер, аналар кеңесінің мүшелері,»Қоғамдық келісім» КММ-нің Сауран аудандық филиалының мамандары, зиялы қауым, қоғамдық ұйымдар, облыстық басқармалар, аудан әкімдік аппараты, дербес бөлімдер, ауылдық округтер мен барлық мекеме қызметкерлері мен тұрғындары қатысты.
Аталған аумақтар бойынша көше бойлары қоқыстан тазартылды. Тұрғын үйлердің қасбеттері ретке келтіріліп, сырланып, бей берекет өскен талдар қырқылып, әктелді. Сонымен бірге, жаяу жүргіншілер жолдары сырланып, ретсіз өскен шөптер шабылды. Арық атыздар тазартылып, тал егу жұмыстары жүргізілді. Бүгінгі аудан көлеміндегі жалпы сенбілікте 280 тонна қоқыс шығарылып, оған 18 техника жұмылдырылды.
