Түркістан облысы, Келес ауданының тұрғындары еліміздің су басқан өңірлеріндегі жағдайға алаңдаушылық танытып, өз көмектерін көрсетіп жатыр. Бүгін Келес халқы атынан ауыр жүк көлігіне тиелген кезекті гуманитарлық көмек керуені жолға шықты. Аудан басшысы Жәнібек Ағыбаев атқарылып жатқан шараның маңыздылығын айтып, күрделі жағдай кезінде көмек қолын созған аудан тұрғындарына, кәсіпкерлеріне, жастарына, алғысын білдірді.
– Еліміздің бірқатар өңірлері су тасқыны болып, материалдық шығындар келтірілді. Халқымыздың ауызбіршілігі мен ынтымағы осындай сын сағаттарда көрініс беретіндігі көңіл қуантады. Алғашқы күннен бастап ауданда билер мен имамдардың ұйымдастыруымен штаб құрылып, жылу жинала бастады. Міне бүгін үшінші рет батыс өңірлеріне келестіктер атынан гумантиарлық көмек жіберіп отырмыз. Көмек қолын созған барлық азаматтарға, алғысымды білдіремін, — деді Жәнібек Ағыбаев.
Айта кетейік, қайырымдылық жасаудан қарапайым халық та, қалталы азаматтар да шет қалмауда. Ісмер Ұлбосын Рүстемова жастық пен төсеніш бұйымдарын тігіп, Ақтөбе, Атырау облыстарына жөнелтпек. Бұл бастаманы өзге тігінші қыз-келіншектер де бірден қолдап, барынша атсалысуда. Сонымен қатар аудандық жастар ресурстық орталығының мамандары да тасқын болған алғашқы күннен бастап гуманитарлық көмек жинауға қолғабыс етіп жүр. Кәсіпкерлер мен ауыл тұрғындарынан жиналған қаражатқа жастар дүкеннен қажетті заттарды алып, бәрін көлікке тиеп, батысқа жөнелту жұмыстарын атқаруда.
