Елімізде 8 сәуір күні республикалық «Таза Қазақстан» экологиялық акциясы бастау алған болатын. Науқан бес аптаға созылады және әр аптаның өзіндік тақырыбы мен нақты мақсаты бар.
Аталған тазалық шарасына Түркістан облысының тұрғындары да ерекше қолдау білдіріп, жұмыстарды белсенді бастап кетті.
Экологиялық акцияның алғашқы аптасы «Таза өлке» апталығы аясында мекеме ұжымдары, өңір тұрғындары, қоғам белсенділері, ұйымдар мен кәсіпорындардың қызметкерлері іргелес аумақтар мен белгіленген аулаларды тазалау, көгалдандыру, ағаштарды күтіп-баптау жұмыстарын жүргізуде.
Осы орайда, бүгін Түркістан қаласында сенбілік өткізілді. Іс-шара барысында «Ұлы Дала Елі» орталығы аумағында тазалау жұмыстары жүргізілді. Тазалық шарасына Түркістан облыстық қоғамдық даму басқармасы мен басқармаға қарасты мекеме қызметкерлері қатысты.
Сенбілік барысында Түркістан облыстық қоғамдық даму басқармасының басшысы Ерлан Күзембаев қоршаған ортаның тазалығына жауапкершілікпен қарау – әрбір азаматтың басты міндеті екенін атап өтті.
Табиғатты қорғауға үндеген шараға «Қоғамдық келісім» КММ-нің ұжымы да қатысты. Мекеме басшысының орынбасары Ерназар Баетов бастаған ұжым қызметкерлері қала тазалығына атсалысып, шаһардың көркеюіне өз үлестерін қосты. Аталған тазалық шарасына «Қоғамдық келісім» КММ-нің аудан, қалалардағы филиалдары да атсалысты.
Еске сала кетсек, «Таза Қазақстан»
акциясы 5 аптаға созылады. 6 сәуірден басталған игі шара 11 мамырға дейін жалғасады. Одан кейін осы жұмыстарды дағдыға айналдыру көзделген. Әр аптаның өзіндік атауы мен нақты мақсаттары бар. 6-13 сәуір аралығында «Таза өлке» апталығы өтсе, 13-20 сәуір аралығында – «Киелі мекен», 20-27 сәуір аралығында – «Жасыл аймақ», 27 сәуірден 4 мамырға дейін «Өнегелі ұрпақ» апталығы, 4 мамырдан 11 мамырға дейін «Мөлдір бұлақ» апталығы өтпек. Жұмыстар қарқынды жалғасады.
Мемлекет басшысы:
Қазақ спортшыларының өткен аптадағы жарқын жеңістері
