Түркістан облысы Мақтаарал ауданы азербайжан этномәдени бірлестігінің төрағасы Рамис Махмудов Ақтөбеге гуманитарлық көмек жөнелту мақсатында өз жүк көлігін ұсынып отыр. Осы орайда «Күшіміз бірлікте» акциясы аясында Мақтааралдың ерікті тұрғындары жүк көлігіне тасқын судан зардап шегіп жатқан азаматтарға қолдан келгенше көмектесіп, қажетті заттарды әкеліп салып жатыр.
Осынау қиын қыстау кезеңде барлық ұлт өкілдері бір жағадан бас, бір жеңнен қол шығарып, жаппай көмекке ұмтылғаны біздің бірлігіміздің тұтастығын айқындап тұрғандай. Күнгей жұртшылығы оңтүстіктегі табиғи апаттар мен су тасқыны кезінде басқа өңірлерден келген көмектерді ұмытпаған. Сондықтан гуманитарлық көмек жинауға белсенді түрде қатысып жатыр. Күшіміз бірлікте! Біз біріксек, алынбайтын асу жоқ!
