Бүгін Түркістан қаласындағы «Ұлы Дала Елі» орталығында Республика күні ұлттық мерекесіне орай Қазақстан халқы Ассамблеясының «Қазақтану» жобасы аясында «Мың бала» мәдени-ағартушылық жобасының қорытынды облыстық байқауы өтті.
Аталған байқау Түркістан облыстық қоғамдық даму басқармасының «Қоғамдық келісім» КММ-нің қолдауымен ұйымдастырылды.
Ашылу салтанатында сөз алған облыстық қоғамдық даму басқармасы басшысының орынбасары Керімбек Мырзабаев байқаудың қазақстандық бірегейлік пен бірлікті нығайтудағы рөліне тоқталып, қатысушыларға сәттілік тіледі.
– Түркістан облысы – түрлі тағдырмен киелі қазақ жеріне еріксіз жер аударылған және бұрыннан осында мекен еткен этнос өкілдерінің құтты қонысы. Бұл орайда, Қазақстан халқы Ассамблеясының бастамасымен 2015 жылдан бастап қолға алынған «Мың бала» байқауы өңірімізде тұратын түрлі этностардың балалары мен жастарына мемлекеттік тілді үйренуге, салт-дәстүрлер мен әдет-ғұрыптарды білуге мүмкіндік береді. Халқымызда «Өнерлі өрге жүзер» деген ұлағатты сөз бар, облысымызда байқауға қатысушылардың белсенділігі де жыл өткен сайын артып келеді. Қазақ мәдениетін тануға үндеген жоба биылғы 1 сәуірінен 19 қазанға дейінгі кезеңді қамтып, өңіріміздің аудан, қалаларында 7 байқау бойынша өткізілді. Елдік құндылықтарды ұлықтаған байқауға өңірдегі этномәдени бірлестіктердің жастары, жоғары және орта оқу орындарының оқытушылары мен студенттері белсене қатысты, – деді басқарма басшысының орынбасары.
Жас таланттардың шеберлігін шыңдаған байқауға өз саласының білгірлері, мәдениет, өнер саласының майталман мамандары қазылық етті. Әділқазылар мүшелері қатысушылардың сөйлеу мәнеріне, мәтіннің бейнелік жүйесі мен мазмұндық құрылымына, актерлік шеберлігіне, таңдап алынған шығарманың ерекшелігіне мән берді.
Байқауда қазылар қатарында Түркістан облысы қоғамдық даму басқармасы «Қоғамдық келісім» КММ-нің басшысы Эльмира Жанғазиева, Түркістан облыстық ҚХА жанындағы Аналар кеңесінің төрайымы Гүлсара Тоққұлова, Қ.А.Ясауи атындағы халықаралық қазақ-түрік университеті «Орындаушылық өнер» кафедрасының аға оқытушысы Иманәлі Сайманов, Түркістан қалалық білім бөлімінің әдіскері Тоғжан Кенжебаева, Түркістан облыстық мәдениет және туризм басқармасының «Мәдениет және халық шығармашылығы орталығы» КММ-нің бөлім басшысы Мұрат Жұманов болып, төрелік етті.
Байқау қорытындысы бойынша жеңімпаздар мен жүлдегерлер Қазақстан халқы Ассамблеясы облыстық филиалы мен облыстық қоғамдық даму басқармасы тарапынан Алғыс хаттармен және қаржылай сыйлықтармен марапатталды. Нәтижесінде, «Қазақ тілін оқыту бойынша авторлық бағдарламаларды қолданысқа енгізу» байқауы бойынша 1 орынды – Созақ ауданының тілдерді оқыту және дамыту орталығы, 2 орынды – Жетісай ауданының тілдерді оқыту және дамыту орталығы, 3 орынды – Ордабасы ауданының тілдерді оқыту және дамыту орталығы иеленді. Ал, «Өнер алды – қызыл тіл» байқауында түркістандық Мадина Хакимжанова топ жарса, «Өнерлі өрге жүзер» байқауында саурандық Дильноза Таджимет, «Жарқыра, жас дарын!» байқауында отырарлық Иван Клименко, «Мен жастарға сенемін» бейнероликтер байқауында келестік Рухшона Нармаматова үздік шықты. Сондай-ақ «Жүзден жүйрік, мыңнан тұлпар» байқауында 1 орынға — «Игілік» бөбекжай балабақшасы (Жетісай ауданы), 2 орынға — «Ажар» бөбекжай балабақшасы (Түлкібас ауданы), 3 орынға — Мақтаарал ауданы «Бибіхан» бөбекжай балабақшасы лайық деп танылды. Бұдан бөлек, «Қазақстан халқының тілдері күніне» арналған жалпықазақстандық диктант жазу жарысында Төле би атындағы №19 жалпы білім беретін мектеп (Түркістан қаласы), Ж.Тәшенов атындағы жалпы орта білім беретін мектеп (Сауран ауданы), Е.Сарманов атындағы гуманитарлық агроэкономикалық колледжі (Сайрам ауданы) ынталандыру сыйлықтарымен марапатталды.
Облыстық байқаудың жеңімпаздары қараша айында өтетін республикалық кезеңге жолдама алды.
Түркістан облысы қоғамдық даму басқармасы «Қоғамдық келісім» КММ баспасөз қызметі
