Түркістан облысы аумағында орналасқан халық көп жиналатын демалыс орындарында тұрғындар тарапынан экологиялық-санитарлық тазалықты қамтамасыз ету бағытында кешенді профилактикалық-рейдтік шаралар аз болған жоқ.
Түркістан облысы бойынша Экология Департаменті және Полиция қызметкерлерінің, Төтенше жағдай департаменті қызметкерлерінің қатысуымен Сайрам ауданы Ақсу өзені жағалауы аумағында және Ордабасы ауданы Темірлан поселкесі Арыс өзені бойында рейдтік шаралар өткен.
Рейдтік шаралар аясында облыс тұрғындарының демалыс ошақтарында топтаса жиналу, арнайы белгіленбеген орындарда от жағу, жалпы экологиялық-санитарлық, қауіпсіздік талаптарын сақтамау фактілерін анықтау және тәртіп бұзушыларға жария түрде әкімшілік шаралар қолдану көзделді.
Жүргізілген рейд барысында облыс тұрғындары тарапынан экологиялық талаптарды өрескел бұзу фактілері тіркелмеген. Бүгінгі күнге дейін жергілікті атқарушы органдар тарапынан алдағы демалыс күндері көпшілік орындарға баруға шектеу қойылатындығы туралы бұқаралық ақпарат құралдары арқылы жарияланған ескертпелердің нәтижесінде өзен аумағында демалушылар азайған.
Түркістан облысы бойынша экология департаменті мен облыстық құрылымдар тарапынан облыс аумағында өтетін рейдтік шаралар жоспар бойынша жалғасатын болады.
