Аудан әкімі Мұхит Тұрысбеков Шолаққорған -Түркістан бағытындағы «Жасыл белдеу» аумағында болды. Онда атқарылып жатқан жұмыстарды назарға алып, жаңадан қосылған аумағы мен биылғы жылы отырғызылған тал көшеттерінің жай-күйімен танысты.
«Жасыл белдеу» – аймақтарды көгалдандыру, орман алқабын құру мақсатында қолға алынған бағыт. Күрт құбылмалы климатты далада ауқымды қолдан жасалған орман алқабын құру үлгісі әлемде бұған дейін болмаған құбылыс. Әйтсе де бірінші болып мұны Қазақстан қолға алып отыр. Бүгінде көгалдандыру бойынша да көптеген жұмыстар атқарылып жатыр. Жасанды орман алқабын кеңейту, ең алдымен тәлімбақтардың жұмысына байланысты екені белгілі.
«Жасыл белдеу» бағалы бастамасы баянды болып, игілігін жалпақ жұрт көруде. Жасыл желек қалыптастырып, аялап өсірудің өзі оңай шаруа емес еді.
Орман шаруашылығын дамыту бойынша берілген тапсырма жүйе-жүйесімен орындала бастады. Алдымен ағаштардың түрлі сұрыптағы жиынтығы, орманның ортасына қарағай, шырша, аққайың тәрізді ағаштар отырғызылған. Бірте-бірте орманшылардың жанқиярлық еңбегінің нәтижесінде орман өзі гүлдеп, тұқым шашып, ағаш пен жасыл желектің түр-түрі көбейе бастады. Ең бастысы, елорда жұрты және алыс-жақын шетелдерден дүмеп келіп жатқан меймандар көкірегі қанша жұтса да тоймайтын саф ауамен тыныстап, алаңсыз дем алатын, жайлы да әсем, сүйікті орындарына айналды. Жыл өткен сайын жасыл белдеудің аумағы ұлғая түсті. Көгілдір сағыммен мұнартып, көз арбап, көңіл тоғайтып жататын жасыл желектің көкжиегі бірте-бірте кеңейе түсті. Бұрынғы айтақыр жер сыңсыған орман алқабына айналып, қолайлы климатын қалыптастырып, экологиясын жақсарта түсті. Әуел баста көздеген мақсаттың бірі – туған топырағын құрметтей білетін патриоттарды тәрбиелеу. Бұл орайда да, ауқымды жұмыс атқарылды. Мамандар жасыл белдеуіндегі екпе ағаштардың санитарлық жағдайын кірпік қақпай бақылау үстінде болды. Бар жұмыс ғылымның сүйемелдеуімен жүргізілді. Оның өзі бірнеше бағытта өрістеді. Айталық, орман-патологиялық зерттеу, ғылыми-тәжірибелік аймақтарда орман өсімдігі түрлерінің жағдайын бағамдау, кесіп-күту әдістерінің ағашқа әсері таразы басына тартылды.
Жалғыз ағаш қана емес, оның ішіндегі тірі организмнің тіршілігін білдіретін жан-жануардың құрамын мейлінше көбейту де қолға алынды. Жасанды орманның өсімдік әлемі әрі жануарлар құрамы қатар дамыды. Инкубация арқылы мыңдаған құс шығарылып, еркіндікке жіберілді. Қазір ну орманның ішіне енсеңіз, он сан құс жасыл желекке оранған гүл жазира мекеннің сәнін келтіріп, дала оркестрінің қуаныштан құйқылжыған күйін шертіп тұр.
Сондай-ақ “Жасыл белдеу” аумағын одан әрі ұлғайту жөніндегі келелі жоспарларды талқылап, жауапаты мамандарға отырғызылған көшеттерді күтіп-баптау жұмыстарын уақытылы жүргізу керектігін ескертті.
