Түркiстан облыс әкімінің елді мекендерді көркейту, абаттандыру және тазалық жұмыстары бойынша берілген тапсырмасына сәйкес, Түркістан облыс әкімі аппаратының инспекторы Бағлан Аллабергенұлы мен Сауран ауданы әкімінің орынбасары Мақсат Асылбекұлы Ескі Иқан ауылдық округінде болып, тазалық жұмыстарын бақылады.
Аралау барысында Ескі Иқан елді мекені, Шымкент көшесі бойында орналасқан құрылыстарды ретке келтіру туралы бұған дейін нақты тапсырмалар берiлген болатын. Аталған тапсырмалар бойынша Ескі Иқан елді мекені Шымкент көшесінде орналасқан нысандарды ретке келтіру, қураған ағаштар, сондай-ақ ретсіз төгілген құрылыс қалдықтарын тазарту бойынша ауқымды жұмыстар жүйелі түрде жүргiзiлуде.
Ауыл тұрғындарын елді мекен тазалығын сақтауға, ауылды абаттандыру және көркейтуге үлес қосуда белсенді болуға шақырамыз.
Жалпы өткізіліп келе жатқан тазалық шарасының нәтижесі көңілге қонымды. Бұрынғы жағдаймен салыстырғанда көрініс бірте-бірте реттеліп келе жатқаны көзге көрініп тұр. Дегенмен, тазалық мәселесіне немқұрайлық танытып, әдетіне басқан тұрғындардың қоқыстарын тазартылған аумақтарға тастап кеткен жағдайлары көңіл құлазытты. Сол тазартылған аумақтарды әрмен қарай ұқыппен қарап, бүлдірмей ұстап отырудың орнына қаланың сыртқы аумақтарына қоқыстарын тастаумен әлек. Тіптен сенбілік жұмысына жауапкершілікті сезініп, тізе бүгіп атсалысқан бірде бір қала тұрғынын көре алмадық. Сонда тазалық кімге керек?!
Аймақтың тазалығы баршаға ортақ. Әйтсе де, жерлестеріміздің тазалық жөніндегі мәдениетін, түсінігін әлі де көтеру қажет. Тазалық – отбасында қалыптасатын дүние. Шыны керек, кейбір ата-аналар үйде отырып алып балаларын қоқыс төгуге жұмсайтыны жасырын емес. Мұндай жағдайлар рейдтік шаралар барысында көптен кездесуде. Ал, сол бала шынында қоқысты арнайы темір жәшікке апарды ма, жоқ па, әлде аулаға, көше бойына лақтырып кетті ме, қадағалап жатқан жан жоқ. Тазалықты сақтау да – тәрбие. Сондықтан бұл мәселемен күреске тек көше тазалаушылар ғана емес, қоғам атсалысуы керек. Қоршаған орта тазалығы тек өзімізге байланысты екенін естен шығармайық, ағайын!
