Созақта аудан әкімі Мұхит Тұрысбековтің бастамасымен Қызылкөл көлінің аумағында тазалық жұмыстары жүргізілді. Онда көлдің айналасы, емдік қара балшығы бар аумағы мен көлге апарар жолдың бойы тұрмыстық қалдықтар мен күл-қоқыстардан тазартылды.
Акцияның басты мақсаты – экологиялық мәдениетті қалыптастыру және тұрғындарды қоршаған ортаны ластамауға, тазалықты сақтауға шақыру.
Тазалық жұмыстарының басында болған аудан басшысы ұйымдастырылған шараның маңыздылығына тоқталып өтті. Тазалық шарасына ауыл округтеріндегі мекеме ұжымдары, белсенді жастар мен еріктілер жұмыла атсалысты. Шараға қатысушылар туристік аймақтарды және көшелер мен саябақтарды, арық-атыздарды қоқыстан тазартып, арнайы орынға шығарды.
Тазалық жұмыстарының басында болған аудан басшысы ұйымдастырылған шараның маңыздылығына тоқталып өтті.
«Біз әркез қоршаған ортаны таза ұстауымыз керек. Бүгінгі ұйымдастырылған игі шара арқылы көлдің айналасына тұрмыстық қалдықтар мен күл-қоқыстарды бей-берекет тастау және осындай заңсыз әрекеттермен қоғам болып күресуді жүзеге асырамыз. Тазалықты алдымен өзімізден бастасақ, өзге өңірлерден келетін қонақтарға да дұрыс көзқарас қалыптастыратын боламыз», – деді ол.
Айта кетейік, шараға аудандық «Жастар ресурстық орталығы» коммуналдық мемлекеттік мекемесі мен ауыл округтердің жастар ісі жөніндегі мамандары, Құмкент ауылдық округі әкімшілігінің қызметкерлері, қоғамдық негізде жұмыс істейтін азаматтар мен «Жасыл ел» еңбек жасағы және Value ерікті жастардан құрылған 70-ке тарта азамат жұмылдырылып, 3,5 тоннаға жуық қоқыс арнайы орындарға шығарылды.
Тазалықтан тән де, жан да тазарады. Өңірімізде туған жердің тазалығына бейжай қарамайтын азаматтардың қатары артып келе жатқаны қуантады. Экологиялық акция барысында жастар туристік нысандарға барар жолдар мен саябақтарға санитарлық тазалық жұмыстарын жүргізді. Жалпы, Түркістан облысының экологиялық жағдайын жақсарту мақсатында игілікті істер жүзеге асуда. Мәселен, облыс орталығында 7700 га жерге «Жасыл белдеу» құру жоспарланып, бүгінгі таңда барлығы 13 629 га жерге көшеттер егіліп, күтіп-бапталуда. Алдағы уақытта «Жасыл белдеу» аумағын 30 мың гектарға жеткізу көзделуде. Тазалық – адамның рухани, мәдени жетілу деңгейінің маңызды көрсеткішінің бірі екенін ескерсек, сенбілікте ғана емес, әр күні айналымызды таза ұстауға атсалысайық.
Эко-акциялар мен сенбіліктер арқасында облыс аумағы тазарып, көшелері көріктеніп, ажарлана түсті. Аталған акция өңірде алдағы уақытта да жалғасады.
